Шри-Ланкада MV X-Press Pearl номли катта контейнерлар ташувчи юк кемасида 20 май куни бошланган ёнғин ўчирилди. Бу ҳақда The Australiaн хабар берди.
«Ҳарбий денгиз флоти Шри-Ланка соҳиллари яқинида Сингапур юк кемасида қайд этилган ва 13 кун аввал бошланган ёнғин муваффақиятли ўчирилганини хабар қилди», — дейилади хабарда.
Қайд этилишича, ёнғин тўлиқ бартараф қилинганидан кейин Нидерландиянинг SMIT қутқарув компанияси экспертлари кема бортига чиқиб, унинг машина бўлинмаси тўлиқ сув остида қолиб кетганини аниқлаган.
Аввал Шри-Ланканинг Коломбо соҳиллари яқинида 25 тонна азот кислотаси ортилган MV X-Press Pearl кемасида бир неча кун аввал ёнғин содир бўлаётгани ва портлашлар ҳам кузатилгани хабар қилинганди.
Май бошида Бангладешда йўловчи ташувчи қайиқнинг юк кемаси билан тўқнашуви йўловчиларнинг ўлимига сабаб бўлганди. Апрель ойида эса БАА қирғоқларида Исроил юк кемасига ҳужум уюштирилгани, мазкур ҳолатдан кейин мамлакат ҳарбий денгиз кучлари шай ҳолатга келтирилгани хабар қилинганди.
Изоҳ (0)