АҚШ йил бошида Бирлашган Араб Амирликлари (БАА) қирғоқлари яқинида қўлга олинган танкердаги Эрон нефтини сотиб юборди. Бу ҳақда суд ҳужжатларига таяниб, Associated Press хабар берди.
Либерия байроғи остидаги Achilleas танкери февраль ойида Фужайра порт шаҳри соҳилида қўлга олинган эди. Ҳужжатларга кўра, АҚШнинг терроризмга қарши қонунлари асосида ундаги нефть мусодара қилинган. Америка ҳукуматининг фикрича АҚШда террористик ташкилот сифатида тан олинган Ислом инқилоби посбонлари корпуси (IRGC) танкердан кейинроқ сотиш мақсадида Хитойга нефть етказиб бериш учун фойдаланмоқчи бўлган.
Прокурорларнинг таъкидлашича, юкни жўнатганлар қўшни Ироқдан олиб келинаётган «Басра енгил нефти» белгиси остида юкни яширишга ҳаракат қилган.
Агентлик маълумотларига кўра, АҚШ ҳукумати танкерни Техас штатидаги Хьюстон шаҳрига етказиб берган. Кейинчалик, Achilleas бортидаги 2 миллион баррелдан сал кўпроқ нефть 110 миллион долларга сотилган (бир баррель учун тахминан 55 доллар). «Пул суд жараёни давомида шартли депозит сифатида сақланади», — дейилади хабарда.
Эрон Ташқи ишлар вазирлиги вакили Саид Хатибзода Эрон нефти партиясининг сотилиши ҳақидаги саволга жавоб берар экан, тафсилотлардан бехабарлигини айтди. «АҚШ собиқ президенти Билл Клинтон давридан бери қонунлари туфайли АҚШ Эрондан нефть сотиб олмаган», — дейди у.
Агентликнинг таъкидлашича, Энергия ахборот маъмурияти (EIA) маълумотларига кўра, 2020 йилнинг октябрь ойида Қўшма Штатлар 1,1 миллион баррель Эрон нефтини импорт қилган — эҳтимол у ҳам шундай мусодара натижаси бўлиши мумкин.
Мавзуга доир:
- Кувайтда жойлашган дунёдаги энг катта нефть конида ёнғин содир бўлди
- Bloomberg: Пандемия даврида тўпланган нефть захиралари тугаб битди
- Хусийлар Saudi Aramco нефть компаниясини ўққа тутгани ҳақида маълум қилди
- Техасда кузатилган рекорд даражадаги совуқ об-ҳаво WTI маркасидаги нефтнинг нархига таъсир қилди
Изоҳ (0)