Жанговар учар қурилма биринчи марта тўлиқ автоном режимда, яъни инсон аралашувисиз 2020 йилда Ливиядаги уруш пайтида одамларни кузатган ва уларга ҳужум қилган. Бу ҳақда Бирлашган Миллатлар Ташкилоти (БМТ) Хавфсизлик кенгаши Ливия бўйича экспертлар гуруҳининг ҳисоботида айтилган.
Ҳодиса 2020 йилнинг март ойида содир бўлган. Ливиядаги ҳарбий ҳаракатлар пайтида терроризмга қарши курашда фойдаланилган Туркиянинг KARGU-2 жанговар учувчисиз қурилмалари Ливия Миллий армияси қўмондони фелдмаршал Халифа Хафтарнинг чекинаётган аскарларига ҳужум қилган.
Учувчисиз қурилмалар узоқ вақтдан бери ҳарбий мақсадларда фойдаланиб келинади, аммо бу жараёнда доим инсон иштироки бўлади — нишонни олдиндан белгилайди ёки операцияни бошқаради. Ливиядаги ҳолатда квадрокоптер ўз-ўзидан нишонга ҳужум қилишга қарор қилган.
«Ўлдирувчи автоном қурол тизимлари оператор ва ўқ-дорилар ўртасидаги алоқани талаб қилмасдан нишонларни уриш учун дастурлаштирилган: бу автоном бошқариш режимининг тўлиқ қўлланилиши бўлган», — дейилади ҳисоботда.
Ҳисобот муаллифлари Ливиядаги воқеа тўғрисида тўлиқ маълумот бермади. Дронлар ҳужуми оқибатида қурбонлар бўлган-бўлмагани аниқ эмас.
«Агар дронлар одамларни ўлдиргани тасдиқланса, бу сунъий ақлга асосланган автоном қуроллардан биринчи марта ўлдириш учун фойдаланиш бўлади», — деди Терроризм ва аксилтеррор сиёсатини ўрганиш бўйича миллий консорсиум мутахассиси Зак Калленборн.Унинг фикрича, Ливиядаги ҳужум »бу автоном қуролларнинг янги боби бўлиб, унда қурилмалар одамларга ҳужум қилиш ва уларни ўлдириш учун ишлатилади».
Қироллик Бирлашган хизматлари институтининг қуруқликдаги уруш бўйича тадқиқотчиси Жек Уотлининг қайд этишича, бу воқеа автоном қуролларни тартибга солиш масаласини муҳокама қилиш зарурлигини кўрсатмоқда.
Изоҳ (0)