Жонс Ҳопкинс университети маълумотларига кўра, дунёда COVID-19’ни юқтириб олганлар сони 170 587 623 кишига тенглашди, глобал ўлимлар сони эса 3 547 061 кишини ташкил қилмоқда. Касалланганлар сони бўйича доимгидек АҚШ (33,2 миллион), Ҳиндистон (28 миллион), Бразилия (16,5 миллион), Франция (5,7 миллион) ва Туркия (5,2 миллион) етакчилик қилмоқда.
Франция президенти коронавирусга қарши эмланди
Франция президенти Эммануэль Макрон COVID-19’га қарши вакцинациядан ўтганини маълум қилди.«Биз Брижит (Эммануэль Макроннинг рафиқаси) билан эмландик, худди 25 миллион французлар каби, келинглар, эмланайлик! Ўзимизни, яқинларимизни ҳимоя қилиш учун», — деб ёзди Франция президенти Twitter’да.
Макрон айнан қандай вакцина олганига аниқлик киритилмаган.
Коронавирус штаммлари грек алифбоси ҳарфлари билан белгиланади
Жаҳон соғлиқни сақлаш ташкилоти (ЖССТ) маълум қилишича, коронавирус вариантлари энди грек алифбоси ҳарфлари билан белгиланади, бундан мақсад — ушбу штаммлар биринчи марта аниқланган мамлакатларни дискриминация қилмаслик.Таъкидланишича, COVID-19 вариантларини улар топилган жойлар билан аташ «камситувчи ва обрў тўкувчи хусусиятга эга бўлиши мумкин», шу сабабли номларнинг янги тизими яратилган.
Бунинг учун ташкилот олимлар гуруҳини тўплаб, кенг кўламли маслаҳатлашувлар ўтказган. Мутахассислар грек алифбоси ҳарфларидан фойдаланган ҳолда номлашни таклиф қилган.
Мавзуга доир: Ҳиндистон ижтимоий тармоқлардан коронавируснинг «ҳиндча» штамми ҳақидаги постларни ўчириб ташлашни сўради
Фаластинда Россиянинг «Спутник Лайт» вакцинаси рўйхатдан ўтказилди
Фаластин Соғлиқни сақлаш вазирлиги Россиянинг COVID-19’га қарши бир компонентли «Спутник Лайт» вакцинасини рўйхатдан ўтказди.Таъкидланишича, «Спутник Лайт»дан фойдаланиш орқали касалликнинг оғир ҳолатлари эҳтимоли сезиларли даражада пасайиб, касалхонага ётқизиш ҳолатларининг олди олинади.
Икки компонентли «Спутник V» вакцинаси эса Фаластинда январда рўйхатдан ўтказилган эди.
Исроил барча карантин чекловларини бекор қилди
Исроилда коронавирус билан касалланиш даражасининг барқарор паст бўлиб туриши туфайли барча карантин чекловлари бекор қилинди. 31 майгача амал қилиб келган чекловлар узайтирилмади, кучда қолган ягона талаб — бино ичида ниқоб тақиш.Оммавий ва кўнгилочар муассасалар фаолиятига қўйилган чекловлар бекор қилинди, энди дўконлар ва ресторанларда COVID-19’га қарши эмланганлик тўғрисидаги ҳужжат талаб қилинмайди.
«Олти ойдан камроқ вақт аввал биз вакцинация кампаниясини бошладик. Соғлиқни сақлаш тизими ходимларининг аъло даражадаги ишлари туфайли биз дунёдаги энг яхши вакцинация кампаниясини ўтказдик. Биз анчадан буён ўз меҳнатимизнинг касалланиш даражасининг пастлиги кўринишидаги роҳатидан баҳраманд бўляпмиз», — деди соғлиқни сақлаш вазири Юлий Эделштейн.
Изоҳ (0)