«Ўзкомназорат» ижтимоий тармоқлардаги фирибгарлар ҳақида огоҳлантирди

Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси фуқароларни ижтимоий тармоқлардаги фирибгарлардан эҳтиёт бўлишга чақирди.

Таъкидланишича, ижтимоий тармоқларда турли сўровномалар, танловлар, акциялар, ўйинлар, улкан мерос қолдириш, қолдираётган меросини расмийлаштириш, тез бойиб кетиш тўғрисидаги SPAM-хабарлар ва шунга ўхшаш бошқа фейк ахборотлар орқали фуқароларнинг шахсига доир маълумотларини (исми, фамилияси, отасининг исми, туғилган санаси, манзили, шахсини тасдиқловчи ҳужжати, электрон почта ва саҳифаси, ID-картаси ва тўлов карточкалари (пароли, пин-коди), ҳисоб рақамлари ва бошқа тўлов манбалари) фирибгарлик йўли билан ўғирлаш ҳолатлари кундан кунга кўпайиб бормоқда.

«Ижтимоий тармоқдан олган ёлғон хабарга ишониб, бойиш, мол-мулк эгаси ёки меросхўр бўлиш ва катта маблағ эгасига айланиш ниятида Ўзбекистон фуқаролари фирибгарларга ўз шахсий маълумотларини тақдим қилиш оқибатида жиноят ишларига шерик бўлиб қолиши ёки фирибгарлик қурбонига айланиши мумкин», — дейилади огоҳлантиришда.

Шунингдек, хабарда шахсга доир маълумотларни давлат реестрида рўйхатдан ўтказилмаган ижтимоий тармоқлар ва интернет тармоғида эълон қилмаслик тавсия этилган.

Аввалроқ Ўзбекистонда шахсга доир маълумотларни ноқонуний тарқатганлик учун жиноий жавобгарлик кучайтирилиши мумкинлиги ҳамда Ўзбекистон фуқароларининг шахсий маълумотларини мамлакатда сақлаш мажбурий бўлиши ҳақида хабар берилганди.