Қашқадарё вилояти Нишон тумани «Самарқанд» маҳалласида 2007 йилда туғилган А.А. каналда чўкиб кетиб, вафот этди. Бу ҳақда «Nasafnews» хабар қилди.
Маълум бўлишича, бола ўртоқлари билан уйи яқинидаги каналга чўмилиш учун борган. Шу пайт каналга кўп сув келиши оқибатида чўкиб кетган.
Вафот этган бола Нишон туманидаги 19-умумий ўрта таълим мактабининг 7 синфида таҳсил оларди. Воқеа дарс соатлари тугагандан кейин, тушлик пайти тахминан соат 13:00 лар атрофида содир бўлган.
Бу ҳақдаги маълумотни нашрга тасдиқлаган Нишон тумани Халқ таълими бўлими мудири Жаҳонгир Холмуродов бахтсиз ҳодиса 27 май куни содир бўлганини қўшимча қилди.
Бундан аввал Нукусда ўзини каналга ташлаган 16 ёшли қиз қутқарилгани, Наманганда мактаб ўқувчиси 36 яшар аёлни ўлдириб, жасадни каналга ташлаб юборгани ҳамда Нукусда ўзини каналга ташлаган 21 ёшли қизни Миллий гвардия ходимлари қутқариб қолгани ҳақида хабар берилганди.
Изоҳ (0)