Наманган ва Украинанинг Хмельницкий шаҳри «Биродар шаҳарлар» мақомига эга бўлди

Наманган вилояти ҳокими Шавкат Абдураззоқов Украинанинг Хмельницкий шаҳри мэри Александр Симчишин бошчилигидаги делегацияни қабул қилди. Бу ҳақда «Дарё» мухбири Азизбек Абдувалиев хабар бермоқда.

Шавкат Абдураззоқов меҳмонлар билан Наманганда Халқаро гуллар фестивали бўлиб ўтаётган кунларда учрашаётганидан мамнунлигини таъкидлади ва ўзаро ҳамкорликнинг истиқболли йўналишлари борасида таклифларини билдирди. Хусусан, савдо, логистика, саноат ва туризм соҳаларини ривожлантириш борасида салмоқли ишларни амалга ошириш мумкинлиги қайд этилди.

Хмельницкий мэри Александр Симчишин Украинадаги шу номли вилоят маркази бўлган йирик ва қадимий шаҳар маъмурияти Наманган билан ҳамкорликни ҳар томонлама кучайтириш тарафдори эканини таъкидлади.

Наманган ва Хмельницкий шаҳарлари ўртасида иқтисодий алоқалардан ташқари, олий ўқув юртлари ўртасида ҳамкорлик, талабалар алмашинуви ҳам режалаштирилди.

Хмельницкий шаҳри мэри Александр Симчишин ва Наманган шаҳри ҳокими Ғофуржон Жамалов икки ҳудуд ўртасидаги «Биродар шаҳар» келишувини имзолади.

Маросимда Украинанинг Ўзбекистондаги фавқулодда ва мухтор элчиси Николай Дорошенко иштирок этди.