Россия ва Ўзбекистон ҳукуматлари коронавирусга қарши «Спутник V» вакцинасини ишлаб чиқаришни маҳаллийлаштиришга келишиб олди, Ўзбекистон томони дори воситаси ишлаб чиқариладиган ҳудудни ҳам танлаган. Бу ҳақда Россия соғлиқни сақлаш вазири Михаил Мурашкого таяниб, «РИА Новости» хабар берди.
Россия соғлиқни сақлаш вазири Михаил Мурашко бошчилигидаги делегация 28 май куни Президент Шавкат Мирзиёев қабулида бўлгани тўғрисида хабар берилганди.
«Россия ва Ўзбекистон президентларининг топшириғи доирасида ‘Спутник V’ вакцинасини Ўзбекистонда ишлаб чиқариш бўйича келишиб олинди», — дейди Мурашко.
Вазирнинг қўшимча қилишича, Ўзбекистон томони ҳозирда Россия вакцинасини ишлаб чиқаришни йўлга қўядиган ҳудудни танлаб бўлган, лойиҳа устида ишлар олиб борилмоқда.
Эслатиб ўтамиз, Ўзбекистонга «Спутник V» вакцинасининг биринчи партияси 23 апрелга ўтар кечаси етказиб берилган эди (айнан қанча миқдорда вакцина олиб келингани маълум қилинмаган). 27 апрель куни ушбу вакцинанинг навбатдаги партияси олиб келинган. Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. 31 март куни ушбу вакцинадан жами 1 миллион доза сотиб олиниши кўзда тутилгани маълум қилинганди.
Изоҳ (0)