Андижон вилоятининг Асака туманида 2020 йилнинг июнида 9 ёшли қизалоқ танасининг турли жойларига пичоқ тиқиб ўлдириб кетилгани, қотилликда гумонланиб 23 ёшли қўшни аёл қўлга олингани ҳақида хабар берилган эди. Андижон вилоят суди жиноят ишлари бўйича судлов ҳайъатининг 2021 йил 5 майдаги ҳукми билан судланувчи айбсиз деб топилди ва оқланганди. Ушбу иш юзасидан вилоят прокуратураси Олий судга протест киритди, дея хабар бермоқда Бош прокуратура.
Маълум қилинишича, 2020 йил 21 июнь куни Асака туманида 9 ёшли қизнинг мурдаси ўз уйида қотиллик аломатлари билан топилган.
Мазкур ҳолат юзасидан жиноят иши қўзғатилиб, тергов ҳаракатлари Бош прокуратуранинг Ўта оғир жиноятларни тергов қилиш бошқармаси томонидан олиб борилган.
Тўпланган далилларга асосан дастлабки терговда фуқаро А.Х. 2020 йил 21 июнь куни қўшниси Д.А. истиқомат қиладиган уйга ўғрилик мақсадида киргани ва у ердан пул олганига гувоҳ бўлган ёш бола Қ.И.нинг танасига бир неча маротаба пичоқ билан жароҳат етказиб, уни қасддан ўлдиргани аниқланган.
Шунингдек, А.Х. ўғирлик ҳамда фирибгарлик жиноятларини ҳам содир этганлиги ўз исботини топган.
Айбланувчининг айби унинг кўрсатуви бўйича олинган ашёвий далил (пичоқ), пичоқ дастаси ичидан олинган намуна марҳума қизга тегишли эканлиги тасдиқланган экспертиза хулосаси, гувоҳларнинг кўрсатувлари, хусусан, тўрт нафар гувоҳ А.Х. марҳума қизнинг хонадонидан югуриб чиққанини кўришгани ва бошқа далиллар билан тўлиқ исботланган.
Бундан ташқари, А.Х. ўз айбига иқрорлигини ҳам баён қилган. Жумладан, қўшнисининг уйига ўғирлик мақсадида киргани ва шу қўшнининг ёш қизи (марҳума) уни кўриб қолганидан қўрқиб, уни пичоқ билан ўлдирганлигини тан олган.
А.Х.нинг иқрорлик кўрсатувлари реал воқеликка асослангани ва ихтиёрий равишда берилгани суд-психология экспертизаси хулосаси билан тасдиқланган.
Оммавий ахборот воситалари ва ижтимоий тармоқлардаги чиқишларда гўёки «асос» қилиб кўрсатилаётган «марҳума қизнинг зўрлангани» ҳам суд-комиссиявий экспертизада ўз исботини топмаган.
Аввалроқ иш дастлаб 2020 йил 21 июнь куни мазкур жиноят иши айблов хулосаси билан мазмунан кўриш учун Андижон вилоят судига юборилган.Бироқ тергов давомида аниқланган ва исботланган далил ҳамда важлар суд томонидан инобатга олинмаган, ўта оғир жиноят ҳаракатларига етарли баҳо берилмаган.
Шу тариқа Андижон вилоят суди жиноят ишлари бўйича судлов ҳайъатининг 2021 йил 5 майдаги ҳукми билан А.Х. фақатгина фирибгарликда, яъни марҳума қизнинг онасига тегишли бўлган тилла занжирни алдов йўли билан қўлга киритишда айбдор деб топилиб, унга нисбатан 2 йил муддатга озодликдан чеклаш жазоси тайинланган. Ўғирлик, босқинчилик ва мудҳиш жиноят – қотиллик юзасидан эса, у оқланган.
Шу боис 2021 йил 12 май куни Андижон вилоят прокуратураси томонидан Андижон вилоят суди жиноят ишлари бўйича судлов ҳайъатининг 2021 йил 5 майдаги ҳукмига нисбатан Олий суднинг жиноят ишлари бўйича апелляция инстанциясига апелляция тартибида протест келтирилган.
«Бинобарин, Бош прокуратура иш бўйича манфаатдор тарафлар ва кенг жамоатчилик, хусусан, оммавий ахборот воситаларидан қуйидаги жиҳатларга эътибор қаратишни сўрайди:
- биринчидан, вилоят суди томонидан оқланган судланувчининг «айбсиз» эканлиги ҳақида суднинг якуний ҳукми қонуний кучга кирмасдан туриб, хулоса қилишга ҳали эрта.
- иккинчидан, асосан, ҳимоя тарафи ва судланувчи кенг жамоатчиликка тақдим этаётган «тафсилотлар» асосида эҳтиросли хулосаларга келиш ноўриндир.
- учинчидан, айнан суднинг, аниқроғи, Олий суднинг якуний тўхтамидан кейингина жиноят иши бўйича қўшимча равишда тегишли муносабат билдирилади,
Бундан аввал Тошкентда 5 ёшли ўғлини уриб ўлдирган спорт мураббийига суд ҳукми ўқилгани, Андижонлик аёл эри билан жанжаллашиб қолиб, уни пичоқлаб ўлдиргани ҳамда Деҳқонободда ўқитувчини пичоқлаб ўлдирган қотиллардан бири 17 йилга, яна бири 16 йил муддатга қамалгани ҳақида хабар берилганди.
Изоҳ (0)