Германияда совет маршалига тегишли бўлган «Волга» кабриолети сотувга қўйилди

Германиянинг Марбург шаҳрида 1958 йилда ишлаб чиқарилган «ГАЗ-21» кабриолети сотувга қўйилди. Эълонда қайд этилишича, мазкур ноёб нусха 1961—1962 йилларда Германиядаги совет қўшинларининг бош қўмондони лавозимида ишлаган СССР маршали Иван Юковскийга тегишли бўлган. Сотувчи ушбу кабриолет учун 28,4 минг евро сўрамоқда, деб хабар беради Motor.

Ушбу «Волга» 63 йил давомида 15 минг километргина йўл босган. Сотувга қўйилган автомобилга 69 от кучига эга 2,5 литрли бензин двигатель ўрнатилган. Агрегат механик узатмалар қутиси ёрдамида бошқарилади.

Кабриолет кузовидаги «Волга» серияли ишлаб чиқарилмаган. Автомобиль салони қизил чармдан ишланган, кузови сарғиш ёки оқ рангларга бўялган, капотига буғунинг ҳайкалчаси ўрнатилган. Сотувчининг таъкидлашича, кабриолетнинг магнитола, колпаклари ва ёнилғи бакидан бошқа барча эҳтиёт қисмлари оригинал.

Бу 2021 йилда Германияда сотувга қўйилган биринчи «Волга» эмас. Масалан, апрель ойида Шкпау коммунасида 1983 йилда ишлаб чиқарилган «ГАЗ-24» сотувга қўйилганди. Автомобиль ўшанда 8,5 минг еврога баҳоланган.

Аввалроқ идеал ҳолатдаги «Волга» янги BMW Х2’дан ҳам қимматроқ нархга сотилаётгани тўғрисида хабар берилганди.