27 май куни Тошкент шаҳрининг Яккасарой туманида содир бўлган йўл-транспорт ҳодисаси оқибатида бир киши ҳалок бўлди. Бу ҳақда Тошкент шаҳар ИИББ ахборот хизмати хабар берди.
Маълум қилинишича, соат 14:55 ларда туманнинг Бобур кўчасида 53 ёшли ҳайдовчи бошқарувидаги Nexia автомобили Х.Ф. исмли 48 ёшли фуқаро бошқариб кетаётган Isuzu автобуси билан йўл-транспорт ҳодисасини содир этган.
ЙТҲ натижасида енгил автомобиль ҳайдовчиси воқеа жойида вафот этган.
Бундан ташқари, шу куннинг ўзида соат 21:30 лар атрофида Яшнобод тумани Қорасув кўчасида Matiz ҳайдовчиси пиёдани уриб юборган.
Авария оқибатида Наманган вилоятида 1979 йилда туғилган Я.Л. олган тан жароҳатлари билан тиббиёт муассасасига жойлаштирилган. Бироқ тиббиёт ходимларининг саъй-ҳаракатларига қарамасдан пиёда вафот этган.
Мазкур ҳолатлар юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми аломатлари билан жиноят иши қўзғатилган. Тергов ҳаракатлари олиб борилмоқда.
Аввалроқ Самарқандда ухлаб қолган Cobalt ҳайдовчиси ўзидан олдинги «КамАЗ»га урилиши оқибатида икки йўловчи вафот этгани, Бухорода ўзидан олдинги машинани қувиб ўтмоқчи бўлган Nexia ҳайдовчиси қаршисидан келаётган юк машинасига урилиши оқибатида ҳалок бўлгани тўғрисида хабар берилганди.
Изоҳ (0)