Японияда ўтказилган 24 соатли Super Taikyu пойгалар сериясида биринчи бор тўлиқ водородда ҳаракатланувчи автомобиль иштирок этди. Сиқилган водородда юрадиган Toyota Corolla Sport финиш чизиғини босиб ўтишга муваффақ бўлган, деб хабар беради Motor.
Водородда ҳаракатланувчи Toyota Corolla Sport трансмиссия, тўлиқ узатмали тизим, шунингдек, 1,6 литрли уч цилиндрли GR Yaris двигателига эга бўлган, бироқ япон муҳандислари агрегатни жиддий модификация қилган. Киритилган ўзгартиришлар натижасида Corolla тўлиқ водородда ҳаракатланиб, марафон пойгасида иштирок этган тарихдаги биринчи автомобилга айланди. Пойгаларнинг бундан олдинги иштирокчилари водород ёнилғисидан электр энергиясини ишлаб чиқариш йўлида фойдаланган.
24 соатли пойга давомида Corolla ёнилғи қуйиш учун 35 маротаба тўхташни амалга оширган. Ички ёнув двигателига эга рақиб машиналар эса ўртача 20 маротаба тўхташни амалга оширган. Водород двигателлардан фойдаланишнинг асосий ўзига хослиги — газ ёнишининг юқори тезлигида. Шу сабабли муҳандислар спорткарнинг орқа қисмига тўртта композит ёнилғи бакини ўрнатган бўлиб, унда 700 бар газсимон водород сақланган.
Водородли Corolla, нақадар мураккаблигига қарамай, марафон пойгани якунлашга муваффақ бўлган. Toyota вакиллари ушбу технологияни такомиллаштириш ва келажакдаги пойгаларда ҳам водород автомобилларда иштирок этиш ниятида эканликларини маълум қилган. Муҳандисларнинг фикрича, водород двигателлар электромоторларга муносиб рақобатчига айланади.
Аввалроқ Рим Папаси водородда ҳаракатланадиган Toyota седанидан фойдаланишга ўтгани тўғрисида хабар берилганди.
Изоҳ (0)