Germaniyaning Marburg shahrida 1958-yilda ishlab chiqarilgan “GAZ-21” kabrioleti sotuvga qo‘yildi. E’londa qayd etilishicha, mazkur noyob nusxa 1961—1962-yillarda Germaniyadagi sovet qo‘shinlarining bosh qo‘mondoni lavozimida ishlagan SSSR marshali Ivan Yukovskiyga tegishli bo‘lgan. Sotuvchi ushbu kabriolet uchun 28,4 ming yevro so‘ramoqda, deb xabar beradi Motor.
Ushbu “Volga” 63 yil davomida 15 ming kilometrgina yo‘l bosgan. Sotuvga qo‘yilgan avtomobilga 69 ot kuchiga ega 2,5 litrli benzin dvigatel o‘rnatilgan. Agregat mexanik uzatmalar qutisi yordamida boshqariladi.
Kabriolet kuzovidagi “Volga” seriyali ishlab chiqarilmagan. Avtomobil saloni qizil charmdan ishlangan, kuzovi sarg‘ish yoki oq ranglarga bo‘yalgan, kapotiga bug‘uning haykalchasi o‘rnatilgan. Sotuvchining ta’kidlashicha, kabrioletning magnitola, kolpaklari va yonilg‘i bakidan boshqa barcha ehtiyot qismlari original.
Bu 2021-yilda Germaniyada sotuvga qo‘yilgan birinchi “Volga” emas. Masalan, aprel oyida Shkpau kommunasida 1983-yilda ishlab chiqarilgan “GAZ-24” sotuvga qo‘yilgandi. Avtomobil o‘shanda 8,5 ming yevroga baholangan.
Avvalroq ideal holatdagi “Volga” yangi BMW X2’dan ham qimmatroq narxga sotilayotgani to‘g‘risida xabar berilgandi.
Izoh (0)