Тошкентда фуқарони 5 минг доллар эвазига институтга ўқишга киритиб қўймоқчи бўлган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум бўлишича, А.У. фуқаро Х.нинг ишончига кириб, уни 5 минг доллар эвазига Тошкент ирригация ва қишлоқ хўжалигини механизациялаш муҳандислари институтига ўқишга киритиб қўйишни ваъда берган.
А.У. шундан 1000 долларни фирибгарлик йўли билан олган вақтида Департаментнинг Тошкент шаҳар бошқармаси томонидан ИИББ ходимлари билан ҳамкорликда ўтказилган тезкор тадбирда ушланган.
Ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Ангренда 3,5 минг доллар эвазига Жисмоний тарбия университетига киритиб қўймоқчи бўлган шахс ушлангани, Қорақалпоқ давлат университетига ўқишга киритиб қўйиш учун 5 минг доллар сўраган шахслар қўлга олингани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10,5 минг доллар пул олган аёл ушлангани тўғрисида хабар берилганди.
Изоҳ (0)