Toshkentda fuqaroni 5 ming dollar evaziga institutga o‘qishga kiritib qo‘ymoqchi bo‘lgan shaxs ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum bo‘lishicha, A.U. fuqaro X.ning ishonchiga kirib, uni 5 ming dollar evaziga Toshkent irrigatsiya va qishloq xo‘jaligini mexanizatsiyalash muhandislari institutiga o‘qishga kiritib qo‘yishni va’da bergan.
A.U. shundan 1000 dollarni firibgarlik yo‘li bilan olgan vaqtida Departamentning Toshkent shahar boshqarmasi tomonidan IIBB xodimlari bilan hamkorlikda o‘tkazilgan tezkor tadbirda ushlangan.
Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Angrenda 3,5 ming dollar evaziga Jismoniy tarbiya universitetiga kiritib qo‘ymoqchi bo‘lgan shaxs ushlangani, Qoraqalpoq davlat universitetiga o‘qishga kiritib qo‘yish uchun 5 ming dollar so‘ragan shaxslar qo‘lga olingani, Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10,5 ming dollar pul olgan ayol ushlangani to‘g‘risida xabar berilgandi.
Izoh (0)