Ўзбекистонда 2021 йилнинг бошидан буён 3294 та ёнғин содир бўлган, дея хабар бермоқда Фавқулодда вазиятлар вазирлиги бош бошқарма бошлиғи Даврон Қамбаров.
Маълумотларга кўра, 2021 йилнинг ўтган 4 ойи давомида республика ҳудудида жами 3294 та ёнғин қайд этилиб, ушбу ёнғинларда 46 нафар инсон ҳалок бўлган ва 94 нафар киши тан жароҳати олди.
Шунингдек, 2021 йилнинг ўтган 4 ойи давомида ўтказилган профилактик ишлар натижасида 6197 та бино ва иншоотда ёнғин келиб чиқиш хавфининг олди олинган.
Содир бўлган ёнғинларни ўчириш вақтида кўрилган тезкор ҳаракатлар натижасида 14 нафар инсон қутқарилган, 37 бош уй ҳайвони, 25 хил техника, 154 миллиард сўмдан зиёд бино ва иншоотлар қурилмалари ва 38 миллиард сўмдан ортиқ моддий бойликлар сақлаб қолинган.
Жами содир бўлган ёнғинларнинг 80,8 фоизи аҳоли яшаш жойларида, 4,8 фоизи транспорт воситаларида юзага келган.
Ёнғинларнинг 35,5 фоизи электр ускуналаридан фойдаланиш қоидаларининг бузилиши, 23,3 фоизи очиқ оловдан эҳтиётсизлик билан фойдаланиш, 22,8 фоизи иситиш печларининг носозлиги ёки улардан нотўғри фойдаланиш, 7,2 фоизи болаларнинг шўхлиги ва 3,7 фоизи транспорт воситаларидан фойдаланиш ва тузилиши қоидаларининг бузилишидан содир бўлган.
Бундан аввал Андижондаги «Ўзбегим» савдо мажмуасида ёнғин юз бергани, Ургутдаги деҳқон бозорида ёнғин чиққани ҳамда Сергелидаги бешта ҳовлининг ёниб кетишига сув етишмовчилиги ва йўллардаги тирбандлик сабаб қилиб кўрсатилгани ҳақида хабар берилганди.
Изоҳ (0)