Кучли бешлик чемпионатларининг учтасида 2020/21 йилги мавсум якунларига кўра ғайритабиий натижа қайд этилди.
Twitter’даги Gracenote Ливеънинг ёзишича, Англия Премьер Лигаси учрашувларнинг атиги 38 фоизида мезбонларнинг қўли баланд келди. Франция чемпионатида бу кўрсаткич 37 фоизга тенг бўлса, Ла Лигада 42 фоизни ташкил қилган. Бу ҳар бир лига учун энг паст кўрсаткичлар ҳисобланади.
Қайд этиш жоиз, 2020/21 йилги мавсумнинг катта қисми коронавирус пандемияси туфайли томошабинларсиз ўтказилди, табиийки, бу мезбон жамоаларнинг ўйинига таъсир ўтказди. Фақатгина мавсумнинг сўнгги қисмига келибгина бир қанча лигаларда мухлислар ташрифига рухсат берилди.
Англияда «Манчестер Сити» муддатидан олдин чемпионлик масаласини ҳал қилган бўлса, Испания ва Францияда барчаси сўнгги турда ҳал бўлди. «Атлетико М» (Испания) ва «Лилль» (Франция) мусобақа грандларини ортда қолдирган ҳолда чемпионликни қўлга киритди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)