«Интер»га А Серия ғолиблигини келтирган Антонио Конте 48 соат ичида клубни тарк этиши мумкин

«Интер» бош мураббийи Антонио Конте клуб раҳбарияти билан келишмовчиликлар туфайли жамоани тарк этиши мумкин, деб ёзмоқда Gazetta dello Sport.

Ортда қолган 2020/21 йилги мавсумда А Серияда ғолибликни қўлга киритган 51 ёшли мутахассис «нерадзурри» раҳбариятининг молиялаштиришни қисқартирмоқчи эканлигидан норози.

Қайд этилишича, «Интер» президенти Стивен Чжан жамоанинг бир қанча етакчи футболчиларини сотмоқчи, шунингдек, иш ҳақини ҳам 15-20 фоизга қисқартирмоқчи. Контега бу қарорлар ёқмаган, у кейинги мавсум учун жамоани кучайтириш керак деб ҳисобламоқда. Аҳвол шу даражага етганки, яқин 48 соат ичида томонлар ўзаро шартномани бекор қилиши мумкин.

Агар Конте жамоани тарк этса, унинг ўрнини Массимилиано Аллегри, Синиша Михайлович, Паулу Фонсека ёки Маурицио Сарри эгаллаши мумкин. Унинг ўзига эса «Реал» томонидан қизиқиш билдирилаётгани айтилмоқда.

Конте 2019 йилдан бери «Интер»ни бошқариб келади. Жамоа унинг қўл остида 2020/21 йилги мавсумда 11 йиллик танаффусдан кейин А Серияда зафар қучди.