Ҳозирда Ўзбекистонда 2685 та тез тиббий ёрдам бригадаси мавжуд. Бу ҳақда АОКАда «Шошилинч ва тез тиббий ёрдам: кафолатли, ишончли ва сифатли хизмат» мавзусидаги матбуот анжуманида маълум қилинди, дея хабар бермоқда ССВ матбуот хизмати.
Ўзбекистонда 2016 йилда 800 та тез ёрдам шохобчаси мавжуд бўлган бўлса, ҳозирда уларнинг сони 1666 тага етказилган. Тез тиббий ёрдам бригадалари 2016 йилда жами 1648 тани ташкил қилган бўлса, ҳозирги кунда 2685 тага етган. Ўша даврда (2016 йилда) Тошкент шаҳри тез ёрдам тармоғида 4 та реанимобиль бор бўлган.
«Биргина ўтган 2020 йилнинг 4 ойи давомида Тошкент шаҳар тез тиббий ёрдам станциясига 150 дона Ford русумли реанимацион тиббий аппаратлар билан жиҳозланган тез тиббий ёрдам автомашинаси харид қилинди. Бугун эса республиканинг тез тиббий ёрдам хизматида 435 та реанимобиль мавжуд. Аста-секин тез тиббий ёрдамда Damas автомобилларидан бутунлай воз кечиш режалаштирилмоқда», — дейди Республика шошилинч тиббий ёрдам илмий маркази бош директори Даврон Тўлаганов.
Қайд этилишича, ҳозирда тез тиббий ёрдамнинг кечикишлари 10—12 фоиздан 1—2 фоизгача камайди. Чақириқларга етиб бориш вақти ўртача 25—30 дақиқа бўлган бўлса, ҳозир 8—12 дақиқани ташкил қилади.
Бундан аввал Шавкат Мирзиёев 1 октябрга қадар ҳудудларга мингта Volkswagen Caddy русумли тез тиббий ёрдам машинаси етказилиши, Ўзбекистонда тез ёрдамнинг битта чақириғи учун неча пул ажратилаётгани маълум қилингани ҳамда Андижонда тез ёрдам машинаси иштирокида ЙТҲ содир бўлгани ҳақида хабар берилганди.
Изоҳ (0)