Тошкент шаҳрида реклама конструкцияларини ноқонуний бузиб ташлаш ишлари давом этмоқда. Бугунги кунда 700 дан ортиқ реклама баннерлари олиб ташланган. Humo Media агентлиги 20 га яқин баннеридан айрилган, деб хабар беради «Подробно».
«Бизнес секин-аста тўхтаяпти. Ҳозирда Шота Руставели ва Янги Сергели кўчаларидаги баннерлар бузилмоқда. Яхши ҳолатда болтларни кесишмоқда ва билбордни омборга олиб кетиш мумкин. Лекин конструкцияларнинг экскаваторлар ёрдамида бузиб, мулкка зарар етказиш ҳолатлари ҳам учраб турибди. Тадбиркорлар ҳатто ҳужжатлар ва паспорт билан ҳам бирор нимага эриша олмаяпти. Энг муҳими, мазкур вазиятда маҳаллий ҳокимият томонидан ҳеч қандай ҳужжат тақдим этилмаяпти. Экскаватор ковшлари билан мулкимизга зарар етказиб, буни қонуний ҳаракат дейишмоқда», — дейди Humo Media директори Савелий Соколов.
Вазирлар Маҳкамасининг 2020 йил 20 февралдаги «Ташқи реклама бозорини тартибга солиш тўғрисида»ги қарори билан реклама баннерларини талабларга мос равишда созлаш, шунингдек, шаҳарнинг марказий кўчаларидаги анъанавий конструкцияларни ёруғлик диодли экранларга алмаштириш талаб этилади. Ушбу кўчалар рўйхати пойтахт ҳокимлиги томонидан тасдиқланади. Соколовнинг сўзларига кўра, ҳокимият вакилларидан бирор ким рекламачиларга ушбу рўйхатни тақдим этмаган.
«Бироқ нима бўлганда ҳам реклама баннерини олиб ташлаш учун суд қарори керак. Мазкур қарорни ишлаб чиқиш вақтида айрим шахслар суднинг реклама конструкцияларини бузиш жараёнида иштирокини чиқариб ташлашни талаб қилганди. Умуман олганда, ҳукумат шундоқ ҳам усиз ҳаракат қилишга қарор қилди», — дея таъкидлайди Humo Media директори.
Реклама конструкциялари тадбиркорларнинг хусусий мулки ҳисобланади. Унинг маълум қилишича, «Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида»ги қонунга мурожаат қилинадиган бўлса, билбордларни бузиш орқали келтирилган зарар қоплаб берилиши керак. Аммо ўз мулкини ҳимоя қилиш учун келган тадбиркорларга «тепадаги» номаълум шахсларнинг буйруғини бажариб, ўзларининг хатти-ҳаракатини ҳатто аниқ асослаб бера олишмаётган бир пайтда қанақа компенсация ҳақида гап бўлиши мумкин?
Соколовнинг сўзларига кўра, реклама баннерларини бузишда турли баҳоналардан фойдаланилмоқда. Биринчи навбатда баннерларни бузаётганлар ушбу конструкциянинг ноқонунийлигини асослашга уринмоқда. Бироқ тегишли ҳужжатлар намойиш этилгандан сўнг улар LED-экран ўрнатиш тўғрисидаги фармон талаблари бажарилмаганини кўрсатмоқда. Айрим кўчаларда LED-дисплейлар ўрнатиш талаб этилмаслиги таъкидланган ҳолатларда эса улар шунчаки елка қисяпти.
«Ички ишлар ушбу вазиятга ҳеч қандай чора кўрмаяпти. Ҳуқуқ-тартибот органлари ходимлари чақирув реклама баннерларининг бузилишига боғлиқ эканлигини билгач, аризани шунчаки бекор қилиб, кетиб қолмоқда ёки ўзингни жамоат тартибини бузганинг учун олиб кетяпти. Мазкур бузилишларга қонуний баҳо беришни сўраб Бош прокуратурага мурожаат қилдим. Жавобини кутяпман. Ижойиб жавоб бўлмаса, кейинги инстанция суд бўлади», — дейди Савелий Соколов.
«Шахсан ўзим бозорни тартибга солиш, шаҳарни тозалаш тарафдориман. Тошкентда жуда кўп ноқонуний конструкциялар, чиқиндилар бор. Аммо келинг, барчасини расмий, қонун ва ҳужжатларга асосан, бошқа вариантларни тақдим этган ҳолда амалга оширайлик», — дейди Humo Media раҳбари.
Мавзуга доир: Тошкентдаги ташқи реклама объектлари нега бузилмоқда? Ҳар бир соҳа мутасаддилари бунга жавоб берди
Савдо-саноат палатаси реклама баннерлари нима сабабдан бузилаётганига ойдинлик киритиш мақсадида Тошкент ҳокимлигига сўров юборди. Монополияга қарши курашиш қўмитаси Тошкент шаҳрида жойлашган 6630 та конструкциянинг 3207 таси ёки 50 фоизга яқинида камчилик аниқланганини маълум қилди.
Апрель охирларида Тошкент шаҳар ҳокими ўринбосари Фурқат Маҳмудхўжаев ҳуқуқ-тартибот идоралари пойтахтда ноқонуний реклама конструкциялари пайдо бўлгани, лекин бунга ҳеч ким эътибор бермаганига ҳуқуқий баҳо бериши кераклигини айтганди.
Изоҳ (0)