Hozirda O‘zbekistonda 2685 ta tez tibbiy yordam brigadasi mavjud. Bu haqda AOKAda “Shoshilinch va tez tibbiy yordam: kafolatli, ishonchli va sifatli xizmat” mavzusidagi matbuot anjumanida ma’lum qilindi, deya xabar bermoqda SSV matbuot xizmati.
O‘zbekistonda 2016-yilda 800 ta tez yordam shoxobchasi mavjud bo‘lgan bo‘lsa, hozirda ularning soni 1666 taga yetkazilgan. Tez tibbiy yordam brigadalari 2016-yilda jami 1648 tani tashkil qilgan bo‘lsa, hozirgi kunda 2685 taga yetgan. O‘sha davrda (2016-yilda) Toshkent shahri tez yordam tarmog‘ida 4 ta reanimobil bor bo‘lgan.
“Birgina o‘tgan 2020-yilning 4 oyi davomida Toshkent shahar tez tibbiy yordam stansiyasiga 150 dona Ford rusumli reanimatsion tibbiy apparatlar bilan jihozlangan tez tibbiy yordam avtomashinasi xarid qilindi. Bugun esa respublikaning tez tibbiy yordam xizmatida 435 ta reanimobil mavjud. Asta-sekin tez tibbiy yordamda Damas avtomobillaridan butunlay voz kechish rejalashtirilmoqda”, — deydi Respublika shoshilinch tibbiy yordam ilmiy markazi bosh direktori Davron To‘laganov.
Qayd etilishicha, hozirda tez tibbiy yordamning kechikishlari 10—12 foizdan 1—2 foizgacha kamaydi. Chaqiriqlarga yetib borish vaqti o‘rtacha 25—30 daqiqa bo‘lgan bo‘lsa, hozir 8—12 daqiqani tashkil qiladi.
Bundan avval Shavkat Mirziyoyev 1-oktabrga qadar hududlarga mingta Volkswagen Caddy rusumli tez tibbiy yordam mashinasi yetkazilishi, O‘zbekistonda tez yordamning bitta chaqirig‘i uchun necha pul ajratilayotgani ma’lum qilingani hamda Andijonda tez yordam mashinasi ishtirokida YTH sodir bo‘lgani haqida xabar berilgandi.
Izoh (0)