Давлат статистика қўмитаси маълумотларига кўра, Ўзбекистон апрель ойида олтин сотишни қайта тикламади. Мамлакат ушбу металлни охирги марта 2020 йилнинг август ойида сотган.
Spot буни ноодатий ҳолат деб баҳолади, чунки олтин республиканинг бир неча йиллардан буён асосий экспорти бўлиб келган. Баъзан унга экспортнинг 50 фоизи ва ундан ортиғи тўғри келган. Сўнгги йилларда мамлакат йилига 100 тоннадан ортиқ олтин экспорт қилган. Аммо 2021 йилда ҳали олтин сотмади.
Кўпгина мамлакатларда олтин қазиб олувчилар уни ўзлари экспорт қилади. Аммо Ўзбекистонда ягона сотувчи бу Марказий банк. У олтинни қазиб олувчилардан (масалан, «Навоий кон-металлургия комбинати») сотиб олиб, бошқа мамлакатларга (асосан Швейцарияга) экспорт қилади.
Апрель ойи охирларида Марказий банк бошқаруви раисининг ўринбосари Беҳзод Хамроев олтин сотиш ушбу металларнинг нархи энг юқори даражага кўтарилса, қайта тикланишини айтганди.
Хабар ёзилган вақтда бир унция олтин нархи 1887 долларни ташкил этмоқда. Бу 2020 йилнинг ёзида (2000 доллар атрофида) бўлганидек қиммат эмас, шу билан бирга, 2021 йилнинг бошларида (1750 доллар атрофида) бўлгандек арзон ҳам эмас.
Олтин сотишдан тушган маблағ нимага сарфланади?
Саноатга. Сотувдан тушган пул асосан юк машиналари, тўқимачилик толасини қайта ишлаш машиналари, экскаваторлар ва бульдозерлар, моторлар, генераторлар ва трансформаторлар сотиб олишга сарфланади. Тупроқни саралаш ва майдалаш учун ускуналар импорти сезиларли даражада ошди.
Изоҳ (0)