Қашқадарё вилоятининг Чироқчи туманида жойлашган «Умакай» ЙПХ мунтазам постида «Қизил китоб»га киритилган ва ўғирлаб кетилаётгани айтилган 700 га яқин Ўрта Осиё чўл тошбақаси ушлаб қолингани ҳақида хабар берилганди. Ушбу ноёб тошбақалар Бухоро ихтисослаштирилган «Жайрон» питомнигига юборилди. Бу ҳақда «Дарё»га қўриқхона илмий ишлар бўлими мудири Дилшод Турсунов маълум қилди.
Қайд этилишича, браконьер томонидан Қашқадарёдан ноқонуний равишда олиб чиқиб кетилаётган тошбақалар масаласи белгиланган тартибда ҳуқуқий кўриб чиқилган ва ҳолат юзасидан тегишли ҳужжатлар расмийлаштирилган. Шундан сўнг ноёб тошбақалар экологик муҳофаза ҳудуди хавфсиз ҳисобланган Бухоро ихтисослаштирилган «Жайрон» питомнигига жўнатилган.
«Ушбу турдаги тошбақалар Ўзбекистон ‘Қизил китобиъга киритилган бўлиб, Ўрта Осиё чўл тошбақаси (Tortoise Agrionemys horsfieldii) деб номланади. Ноёб эндемик тур ҳисобланган ушбу тошбақалар мамлакатимизнинг барча адирликларида учрайди. Тижорат (экспорт) мақсадида тошбақаларни овлаш ва тухумларини териш, жумладан, браконьерлар томонидан турли ноқонуний мақсадларда териб олиниши натижасида ушбу тур камайиб кетмоқда», — дейди Дилшод Турсунов.
Билдирилишича, Бухоро ихтисослаштирилган «Жайрон» питомнигига олиб келинган тошбақаларни табиатга қўйиб юбориш тадбирида Бухоро давлат тиббиёт институти Тиббий биология кафедраси профессор-ўқитувчилари, институтнинг Қўшма дастур факультети Казан фарм-3 гуруҳи талабалари ҳам иштирок этган.
Мазкур ҳолат юзасидан ҳужжатлар расмийлаштирилиб, андижонлик фуқаро Ш.К.га нисбатан Жиноят кодексининг тегишли моддалари бўйича жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, андижонлик фуқаро Ш.К.га тегишли бўлган юк автомашинасида олиб кетилаётган 700 га яқин ноёб тошбақалар 2021 йилнинг 21 май куни Қашқадарё вилоят Экология ва атроф-муҳитни муҳофаза қилиш бошқармаси, ИИБ ЙПХХ, Ўсимликлар карантин инспекцияси ва ветеринария ходимлари томонидан Чироқчи туманидаги «Умакай» ЙПХ мунтазам масканида тўхтатиб қолинганди.
Изоҳ (0)