Фарғона вилояти ҳокимининг қарори билан Баҳодир Холиқов вилоят ҳокимининг ўринбосари — Маҳалла ва оилани қўллаб-қувватлаш бошқармаси бошлиғи этиб тайинланди. Бу ҳақда вилоят ҳокимлиги матбуот хизмати хабар берди.
Баҳодир Холиқов 1972 йил 26 январда Риштон туманида туғилган. Маълумоти олий. 1994 йил Тошкент давлат иқтисодиёт университетини тамомлаган. Янги ўринбосар тайинловга қадар солиқ тизимида турли масъул лавозимларда фаолият юритган, Марғилон, Қувасой ва Фарғона шаҳарлари Давлат солиқ инспекциялари бошлиғи бўлган.
2019−2020 йилларда Қувасой шаҳар ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — шаҳар иқтисодий тараққиёт ва камбағалликни қисқартириш бўлими бошлиғи бўлиб фаолият олиб борган.
Тайинловга қадар Баҳодир Холиқов вилоят Бандлик бош бошқармаси бошлиғи лавозимида ишлаб келаётган эди.
Эслатиб ўтамиз, 2020 йилнинг февралида Саидмурод Аминжонов Фарғона вилояти ҳокими ўринбосари – Маҳалла ва оилани қўллаб-қувватлаш бошқармаси бошлиғи этиб тайинланганди.
Аввалроқ Иқболжон Эргашев Фарғона вилояти ҳокими ўринбосари — Инвестициялар ва ташқи савдо бошқармаси бошлиғи этиб тайинлангани тўғрисида хабар берилганди.
Изоҳ (0)