Ўзбекистон мустақиллиги ва суверенитетини қўллаб-қувватловчи резолюция АҚШ Конгрессига кўриб чиқиш учун киритилди. Бу ҳақда Конгресс сайтида хабар берилди.
Ҳужжатда Президент Шавкат Мирзиёев ислоҳотлари дастурининг аҳамияти таъкидланиб, инсон ҳуқуқлари, сўз ва ОАВ эркинлиги, дин эркинлигини таъминлаш, шунингдек, коррупцияга қарши чораларни илгари суриш билан боғлиқ вазият яхшиланиши олқишланади.
Шунингдек, ҳужжатда Ўзбекистоннинг Марказий Осиёда иқтисодий етакчи давлат сифатида ўрни тобора ошиб бораётгани таъкидланиб, унинг Афғонистондаги можарони тинч йўл билан ҳал қилиш бўйича саъй-ҳаракатлари юқори баҳоланмоқда.
Ҳозиргача резолюцияни 10 нафар конгрессмен қўллаб-қувватлаган. Июнь ойининг ўрталарига келиб ҳужжат АҚШ Вакиллар палатасида қабул қилиш учун етарли овоз тўплаши кутилмоқда.
Ҳужжатнинг қабул қилиниши Ўзбекистон мустақиллигининг 30 йиллиги ва буни АҚШ тан олганлигининг 30 йиллигига рамзий маъно беради.
Конгресс ушбу резолюцияни қабул қилса, АҚШ бу орқали Ўзбекистон мустақиллиги, ҳудудий яхлитлиги ва суверенитетини таъкидлаган ҳолда, сўнгги йилларда мамлакатда муҳим сиёсий, иқтисодий ва ижтимоий ислоҳотлар бўлаётганини тан олади.
Бундан ташқари, конгрессменлар ушбу резолюцияда Ўзбекистон ҳукуматини турли соҳаларда янги имкониятлар очиш учун АҚШ билан янада чуқурроқ иқтисодий ҳамкорликка чақириши кутилмоқда.
Изоҳ (0)