ИИВ ЙҲХББ ижтимоий тармоқда «Қорақалпоғистонда ҳайдовчига қўл кўтарадиган ЙПХ ходими» сарлавҳаси остида тарқалган видеолавҳа юзасидан маълумот берди.
Маълум қилинишича, 18 май куни соат 11:15 ларда Қорақалпоғистон Республикаси Хўжайли тумани Нукус гузари кўчасида хизмат олиб бораётган ЙПХ инспектори А.Ешмурзаев томонидан ҳайдовчи Т.Б. бошқарувида бўлган Isuzu русумли транспорт воситаси пиёдага йўл бермагани учун тўхтатилган ва унга қоидабузарлик бўйича тушунтириш берилган.
Шундан сўнг ҳайдовчи қоидабузарликни тан олмай қўл телефонига тасвирга олишни бошлаган вақтда, ҳайдовчининг отасиман деб таништирган фуқаро инспекторга автомобилнинг ҳужжатларини олиб бериб, қоғоз баённомага расмийлаштиришни сўраган. Баённома расмийлаштирилганидан сўнг, ҳайдовчи имзо қўйишдан бош тортган ва ЙПХ инспектори билан ҳайдовчи ўртасида низоли вазият келиб чиққан.
Мазкур ҳолат юзасидан Қорақалпоғистон Республикаси ИИВ ЙҲХБ томонидан хизмат текшируви ўтказилмоқда.
Аввалроқ Тошкент вилоятида ўзини «Ойша хола» дея таништирган ЙПХ ходимига хизмат текшируви тайинлангани, Тошкентда ЙПХ инспектори ҳайдовчига ўрта бармоғини кўрсатгани, пойтахтда қуввати тугаганини айтиб, ишламаётган бодикамера билан текширув ўтказган ЙПХ ходимига чора кўрилгани ҳамда Самарқандда ЙПХ инспекторлари фуқарони куч ишлатиб, хизмат машинасида олиб кетгани акс этган видео бўйича расмий изоҳ берилгани ҳақида хабар берилганди.
Изоҳ (0)