Қашқадарё вилоятининг Шаҳрисабз шаҳрида тиббиёт ходимлари ишдан ташқари пайтда мажбурий меҳнатга жалб қилингани хабар берилди. «Дарё» мухбири вазиятга аниқлик киритиш мақсадида Шаҳрисабз шаҳар тиббиёт бирлашмаси бошлиғи Мурод Норов билан суҳбатлашди.
«Аслида ходимларимиз ҳазил-ҳузул қилиб, ўзларини видеога олишган экан. Энди ‘бекор қилибмиз’ дея афсусланишяпти. Ҳеч ким уларни мажбурий меҳнатга жалб қилмаган. Қолаверса, видеодаги ходимларимизнинг барчаси шу атрофнинг, тиббиёт бирлашмаси биноларининг тозалигига жавобгар бўлган санитаркалар бўлган. Уларнинг иши аслида шундай тозалашдан иборат», — дейди шаҳар тиббиёт бирлашмаси бош шифокори Мурод Норов.
Вилоят Меҳнат бандлик бошқармаси бошлиғи Бекзод Қурбонов эса видеодаги ҳолатни тасдиқлаб, тиббиёт бирлашмасида мажбурий меҳнатга йўл қўйилган бўлиши мумкинлигини, вазият ходимлар томонидан ўрганилаётганини, натижа тез орада ОАВга тақдим этилишини билдирди.
Вилоят соғлиқни сақлаш бошқармаси ахборот хизмати раҳбари Нуриддин Эгамов ҳам видеодаги ҳолат Соғлиқни сақлаш бошқармаси томонидан ўрганилаётганини, натижа ҳақида хабар берилишини маълум қилди.Эслатиб ўтамиз, Қашқадарёда бундан аввал ҳам тиббиёт ходимларининг мажбурий меҳнатга жалб қилингани — Яккабоғ тумани тиббиёт бирлашмасида 17 апрель куни бирлашма ходимлари бинонинг атрофида тозалик ва ободонлаштириш ишларига чиқарилгани хабар қилинганди.
Изоҳ (0)