Ijtimoiy tarmoqlarda Qo‘qon shahridagi yonilg‘i quyish shoxobchalarining birida portlash va yong‘in sodir bo‘lgani haqidagi videolar tarqaldi. “Daryo” muxbiri hodisa tafsilotlariga aniqlik kiritish maqsadida Farg‘ona viloyat Favqulodda vaziyatlar boshqarmasi axborot xizmati bilan bog‘landi.
Ma’lum qilinishicha, mazkur hodisa 2021-yil 19-may kuni taxminan soat 14:45 da Qo‘qon shahar Oqtosh ko‘chasida joylashgan UzGazOil avtomobillarga yonilg‘i quyish shoxobchasida sodir bo‘lgan.
AYoQSh hududiga yonilg‘i olib kelgan GAZ-53 yonilg‘i tashish avtomobilida yong‘in kelib chiqqan. Bir necha daqiqa ichida hodisa joyiga FVV hududiy boshqarmasining sakkizta yong‘in-qutqaruv ekipaji yetib kelgan. Yonilg‘i tashuvchi avtomashinada sodir bo‘lgan yong‘in zudlik bilan bartaraf etilgan. Hodisa oqibatida jarohat olganlar va qurbonlar yo‘qligi ma’lum qilingan.
