21 май ҳолатига кўра, бутун дунёда COVID-19’ни юқтирганлар сони 165 558 841 кишини ташкил қилмоқда. Касалланганлар сони бўйича юқори бешликдан АҚШ (33 миллион), Ҳиндистон (26 миллион), Бразилия (15,8 миллион), Франция (5,9 миллион) ва Туркия (5,1 миллион) ўрин олган. Вирус оқибатидаги ўлимлар эса 3 431 054 тага тенг бўлиб турибди.
АҚШ: COVID-19 лабораторияда яратилгани борасида жиддий далиллар бор
АҚШ Вакиллар палатасининг Разведка қўмитасидаги республикачилар коронавирус Хитойда лаборатория шароитида келиб чиққани бўйича «муҳим билвосита далиллар» борлигини маълум қилди. Қўмита аъзолари АҚШ ҳукуматини вируснинг келиб чиқиши бўйича тадқиқотлар олиб борилиши учун Хитойга босим ўтказишга чақирди.«Муҳим билвосита далиллар COVID-19 авж олишига Ухань вирусология университетидан вирус сизиб чиқиши олиб келган бўлиши мумкинлиги ҳақидаги жиддий ташвишларни уйғотмоқда», — дейилади маърузада.
Республикачиларнинг қайд этишича, 2017 йилдаёқ Хитойдаги америкалик дипломатлар Ухандаги лабораторияда зарур хавфсизлик меъёрларига риоя қилинмасдан хавфли коронавируслар тадқиқотлари олиб борилаётгани ҳақида хабар қилиб турган. Маърузада айтилишича, 2019 йилда лабораториянинг бир нечта ходимларида COVID-19 оқибатларига ўхшаган симптомлар кузатилган. Шунингдек, Хитой ҳарбийларининг Ухандаги институтга алоқаси тилга олинган. Бундан ташқари, вируснинг табиий келиб чиқиши борасидаги далиллар камлиги айтилган.
Евроиттифоқда вакцинация сертификати бўйича келишувга эришилди
Европарламент ва Евроиттифоқ кенгаши Европа Иттифоқи аҳолиси учун вакцинация сертификатини жорий қилиш ҳақида дастлабки келишувга эришди.26 май куни матн бўйича Европарламентнинг фуқаро эркинликлари бўйича профилли қўмитаси овоз беради. Евроиттифоқ учун коронавирус сертификатлари бўйича келишув Европарламентнинг 7—10 июнь кунлари Брюсселда бўлиб ўтадиган ялпи сессиясида узил-кесил тасдиқланиши режалаштирилган.
Сертификат рақамли ёки қоғоз шаклида бўлиб, одамнинг вакцина олгани, яқинда тести манфий чиққани ёки инфекциядан соғайганидан дарак беради. Амалда бу учта ҳар хил сертификат бўлади.
Евроиттифоқ мамлакатлари иттифоқнинг бошқа давлатларида берилган сертификатларни тан олиш ёки олмасликни мустақил ҳал қилади.
Мавзуга доир: Ўзбекистонда коронавирусга қарши эмланганларга онлайн-маълумотномаларни бериш бошланди
Таиландда аҳоли COVID-19’га қарши эмланишга сигирлар ва олтин ёрдамида жалб қилинмоқда
Таиланд аҳолисини лотереялар, дўконларга совға купонлари ва ҳатто нақд пул ёрдамида коронавирусга қарши эмланишга жалб этишга қарор қилинди.Таиланднинг инфекция тарқалиши билан боғлиқ вазият энг оғир бўлган бир нечта ҳудудларида шундай акциялар ўтказилмоқда. Хусусан, Чиангмай провинциясида эмланган фуқаролар ўртасида 318 долларлик сигирлар лотереяга қўйилди. Ғолиблар ҳафтада бир марта тасодифий йўл билан аниқланади. Бундан ташқари, вакцинация ҳақидаги сертификатни тақдим этганлар маҳаллий дўкон ва ресторанларда 10 фоизлик чегирмага эга бўлади.
Кхонкен провинциясида эса қимматбаҳо металлардан ясалган тақинчоқлар лотереяга қўйилди. Коронавирусга қарши эмланганлар, хусусан, тилла занжир ютиб олиши мумкин.
Таиланд ҳукуматининг ташаббуси аллақачон ўз самарасини кўрсатди: туманлардан бирининг раҳбари айтишича, бир-икки кунда эмланиш учун рўйхатдан ўтганлар сони ўн марта ошган.
Шунингдек:- Япония ҳукумати Moderna ҳамда AstraZeneca компанияларининг COVID-19’га қарши вакциналарини расман маъқуллади. Мамлакатда иммунизация дастури февралда бошланган бўлиб, ўшандан буён Pfizer препарати қўлланилаётган эди. Ҳозиргача аҳолининг қарийб 4 фоизи эмланган (камида битта доза билан).
- Париждаги Эйфель минораси ташриф буюрувчилар учун 16 июлдан бошлаб очилади, онлайн чипталарни 1 июндан сотиб олиш мумкин. Ташрифчилар сони кунига 10 минг киши билан чекланади. Эйфель минораси Лувр ва Версал билан бирга 2020 йил мартида коронавирус тарқалиши хавфи сабабли ёпилган эди, аммо минора уч ойдан сўнг қайта очилиб, кузда яна ёпиб қўйилганди.
- Венгрияда коронавирусга қарши эмланганлар сони 5 миллион кишидан ошса, чекловлар анча юмшатилади. Ушбу кўрсаткичга келаётган дам олиш кунлари эришиш кутилмоқда. Шундан кейин, хусусан, комендантлик соати бекор қилинади ҳамда жамоат жойларида ниқоб тақмасликка рухсат берилади.
Изоҳ (0)