Ҳиндистонда қора замбуруғ эпидемияси фонида янада хавфлироқ оқ замбуруғ пайдо бўлди
Ҳиндистонда коронавирус тарқалишининг иккиламчи таъсири сифатида пайдо бўлган қора замбуруғ эпидемияси фонида яна бир замбуруғ касаллиги аниқланди, у мамлакатда оқ замбуруғ деб аталади. Бу ҳақда Times of India хабар берди.
COVID-19’нинг ҳалокатли эпидемиясини бошдан кечираётган шарқий Бихар штатида тўрт кишида янги замбуруғ касаллиги қайд этилди. Шифокорлардан бири вафот этди.
Тиббий мутахассисларнинг фикрига кўра, оқ замбуруғ ўпка, ошқозон, буйрак, жинсий аъзолар, шунингдек, тирноқ ва терига ўткир ва тез таъсир этиши сабабли қорасидан хавфлироқ.
Шифокорлар огоҳлантиришича, асосан, бурун бўшлиқлари ва ўпкани зарарлайдиган қора замбуруғдан фарқли ўлароқ, янги инфекция бутун тананинг ҳаётий фаолиятига таъсир қилиши мумкин. Бундан ташқари, оқ замбуруғ билан касалланиш ҳомиладор аёллар ва болалар учун хавфли бўлиши мумкин.
Ҳар иккала замбуруғ касаллигини юқтириш хавфи иммунитети заиф кишиларда, шунингдек, тиббий касалликларга, жумладан, қандли диабетга чалинган, реанимацияда бўлган ва узоқ вақт стероид қабул қилган беморларда юқори бўлади.
Аввалроқ Ҳиндистоннинг Ражастан ва Телангана штатларида қора замбуруғ эпидемияси эълон қилинган эди. Хусусан, Ражастан штатида ушбу инфекция билан касалланган 100 га яқин бемор борлиги айтилган.
Ҳиндистонда COVID-пандемия фонида одамларнинг хавфли замбуруғларга чалиниш ҳолатлари кўпайди. Россиялик вирусологлар мукормикоз касаллиги глобал хавф келтириб чиқармаслигини айтди. Шу билан бирга қора замбуруғ инфекцияси Россияда ҳам қайд этилди.
Маълумот учун, қора замбуруғ — мукормикоз табиатда кенг тарқалган микроскопик замбуруғлар (мукормицетлар) келтириб чиқарадиган ноёб инфекция.
