Сўнгги бир неча кун ичида Марокашдан 8 мингга яқин киши Африка шимолидаги Испаниянинг Сеута мухтор шаҳрига сузиб ёки пиёда кўчиб ўтди. Муҳожирларнинг камида 1500 нафари вояга етмаганлар. Уларнинг аксарияти марокашликлар, аммо улар орасида Саҳрои Кабирдан жанубдаги Африка мамлакатларидан чиққан қочқинлар ҳам бор. Сеута анклави 17-асрдан бери Испания назорати остида. «РБК» муҳожирлар Испанияга қандай ўтаётгани ва ҳукуматнинг инқирозни енгишга оид чоралари ҳақида фоторепортаж тайёрлади.
Сеутадаги воқеалар Испания ва Марокаш ўртасидаги муносабатларнинг 2002 йилдан — Марокаш соҳиллари яқинидаги кимсасиз орол учун ҳудудий можаро келиб чиққанидан буён содир бўлган энг катта инқирозлардан биридир.
Инқирозга Марокаш томонидан чегара назоратининг заифлашиши сабаб бўлган бўлиши мумкин. AP агентлигининг хабар беришича, Марокаш ҳукумати Ғарбий Саҳрои Кабир Озодлик фронти бош котибига Испанияга кириш учун берилган рухсатга шу тарзда жавоб кўрсатган бўлиши мумкин. Ҳозирги вақтда ушбу ҳудудлар атрофида кескинлик кучайган, маҳаллий аҳоли Марокаш ҳукуматидан норози.
El Pais хабар беришича, Испания Ички ишлар вазирлиги Марокаш ҳукумати билан Сеута ҳудудига кириб келган ноқонуний муҳожирларни тезда депортация қилиш тўғрисида келишувга эришди. Ушбу келишув Марокашдан кириб келган ноқонуний муҳожирларни чиқариб юборишни назарда тутади.
El Pais’нинг таъкидлашича, Марокаш чегарачилари ўз навбатида Сеутага ўтиш пунктини ҳар икки соатда очиб, расмий равишда атиги 40-50 кишининг ўтишига имкон беради.
Изоҳ (0)