Тожикистон Соғлиқни сақлаш ва аҳолини ижтимоий муҳофаза қилиш вазирлиги раҳбари Жамолиддин Абдуллозода мамлакатга коронавирус қайтгани ҳақидаги миш-мишларни рад этди, деб ёзади Asia Plus.
«Оммавий ахборот воситаларида мамлакат касалхоналарига яна COVID-19 билан касалланган беморлар ётқизила бошлангани ҳақида хабар берилган. Бу ҳақиқатга тўғри келмайди», — деди вазир.
Унинг сўзларига кўра, аслида республикада «пневмония билан қайта касалланиш» бўйича бир нечта ҳолатлар қайд этилган.
«Шифокорларнинг огоҳлантиришларини эътиборсиз қолдириш натижасида улар пневмонияга чалинган. Беморлар менинг шахсий буйруғим билан юқумли касалликлар шифохоналарида эмас, терапия бўлимига ётқизилди. Уларнинг барчаси сув ҳавзаларида сузиш натижасида ва сўнгги кунлардаги об-ҳаво шароити туфайли пневмонияга чалинган. Улар бошқаларга хавф туғдирмайди ва атрофидагиларга касаллик юқтирмайди», — деди вазир.
У журналистлардан «Тожикистон аҳолиси ва меҳмонлари орасида ваҳима тарқатмасликни» сўради.
Бир кун олдин мамлакат шимолида бир нафар хорижлик коронавирус билан ва яна 15 киши пневмония билан касалхонага ётқизилгани ҳақида хабарлар пайдо бўлди.
Хабарларга кўра, Ўзбекистондан Хўжандга келган Яман фуқаросида COVID-19 тестининг натижаси ижобий чиққан.
Хўжанддаги «Луқмони Ҳаким» лабораторияси раҳбари Акбархон Самадзода 16 май куни Яман фуқаросидан таҳлил олингани, иккита тест ижобий натижа берганини тасдиқлади.
Шу билан бирга, Яман фуқароси ҳозирда даволанаётган Хўжанд юқумли касалликлар шифохонаси бош шифокори Рустам Бўриевнинг айтишича, беморда «коронавирус аломатлари йўқ ва у назорат остида».
Бўриев, шунингдек, сўнгги бир ҳафта ичида юқори ҳарорат туфайли 15 киши юқумли касалликлар шифохонасига ётқизилганини айтди. «Аммо уларга ковид ташхиси қўйилмаган, улар мавсумий пневмонияга чалинган», — дейди у.
Изоҳ (0)