Россиянинг Благовешенск шаҳридаги 27-сонли мактабда 13 май куни эҳтимолий фавқулодда ҳолат сабабли дарслар вақтинча тўхтатилди. Бу ҳақда «Амурская правда» газетаси хабар берди.
Фото: «Амурская правда»
Газетанинг ёзишича, дарсларнинг тўхтатилишига Тамбов туманида яшовчи 17 ёшли ўқувчи томонидан ижтимоий тармоқларда қолдирилган хабар сабаб бўлган.
Қозон шаҳридаги мактабга қилинган ҳужумга оид видео остидаги изоҳларда «Худо сизга ҳакам» ники остида хабар қолдирган ўсмир «Эртага Благовешенскнинг 27-мактабида мен ҳам шундай қиламан» деб ёзган.
Фото: Скриншот
Ўсмир зудлик билан ҳибсга олинди. У терговчиларга «шунчаки ҳазиллашганини» айтган.
Ички ишлар вазирлигининг Амур вилояти бўйича бошқармаси ўқувчига қарши террорчилик ҳаракати тўғрисида қасддан ёлғон хабар бериш моддаси билан жиноий иш қўзғатди. Жиноят кодексининг 207-моддаси 2-қисмига биноан, у беш йилгача озодликдан маҳрум этилиши мумкин.
Благовешенскдаги 27-мактабда ҳеч қандай портловчи восита топилмади. Текширув давомида ўқувчилар уйларига жўнатиб юборилди.
Эслатиб ўтамиз, Қозонда 11 май куни 19 ёшли талаба Илназ Галявиев ўзи аввал таълим олган 175-мактабга қуролли ҳужум уюштирди. У мактабга бир ой олдин қонунан сотиб олган Hatsan Escort қуроли билан келиб, қўлбола бомбани портлатди ва ўқувчиларга қарата ўқ узди. Натижада етти нафар ўқувчи ва икки нафар ёши катта фуқаро ҳалок бўлди, жароҳатланганлар сони 20 дан ошди. Шундан кейин Галявиев ўз хоҳиши билан полицияга таслим бўлди. Жиноят содир этилишидан олдин у Telegram канали очиб, унда ўзини «Худо» деб атади ва «дунёда тирик жонзотлар бўлмаслиги керак, бу борлиқнинг хатоси» деб ёзди.
Шундан сўнг 12 май куни Қримнинг Қизил гвардия туманида ижтимоий тармоқларда маҳаллий лицейни портлатиш таҳдиди билан пост қолдирган эркак ҳибсга олинди. Қрим ҳуқуқ-тартибот органларининг маълумотларига кўра, қонунбузар шу йўл билан махсус хизматларнинг фаолиятини текшириб кўрмоқчи бўлган.
