Қорақалпоғистонда майнингга ихтисослашган махсус зона ташкил этиш режалаштирилмоқда. Бу ҳақда “Қорақалпоғистон Республикасини ижтимоий-иқтисодий ривожлантиришга қаратилган чора-тадбирларни янада жадаллаштириш тўғрисида”ги президент қарорида белгиланди.
Қарор билан 2025-2026 йилларда Қорақалпоғистон Республикасини барқарор ижтимоий-иқтисодий ривожлантириш бўйича асосий мақсадли кўрсаткичларга эришишга қаратилган чора-тадбирлар дастури тасдиқланди. Майнингга ихтисослашган махсус зона ташкил этиш режаси ушбу дастурда кўзда тутилган.
Унга кўра, 2025 йил сентаябргача Қорақалпоғистонда майнинг учун махсус зона ташкил этиш бўйича қарор лойиҳаси ишлаб чиқилиши лозим.
Махсус зонада майнинг учун қайта тикланувчи энергия манбаларидан фойдаланишга рухсат этилади. Махсус зонадан майнинг учун ягона электр энергетика тизимига уланган ҳолда электр энергиясидан фойдаланилган тақдирда махсус тарифлар қўлланилади.
2025 йил ноябрда қарор лойиҳаси белгиланган тартибда тегишли вазирлик ва идоралар билан келишган ҳолда Вазирлар Маҳкамасига киритилади.
2023 йилнинг октябрида майнинг фаолиятини амалга ошириш учун рухсатнома бериш тартиби тўғрисидаги низом тасдиқланган. Майнингни рухсатномасиз амалга ошириш тақиқланади.
Изоҳ (0)