Непалда бир ой ичида коронавирус билан касалланиш даражаси 30 баробарга ошди

Непалда коронавирус билан касалланиш даражасининг кескин ортиши натижасида мамлакатдаги шифохоналарда жой қолмади, деб ёзмоқда Associated Press нашри.

2021 йилнинг 6 май куни 30 миллион аҳолиси бўлган ушбу мамлакатда рекорд даражада 9070 кишида коронавирус қайд этилди. Бу бир ой аввалгига таққослаганда 30 баробар кўпроқ. Шифокорларнинг сўзларига кўра, бугунги кунда коронавирусга чалинган беморлар даволанаётган шифохоналарда бўш ўринлар умуман қолмаган.

«Бўш ўринлар бўлган тақдирда ҳам, кислород танқислиги муаммоси бор. Биз эса ҳали бу инқирознинг чўққисига етмадик», — деди Катманду шаҳри шифохоналарининг бош шифокорларидан бири.

Апрель ойидан бошлаб коронавирус билан касалланиш даражасининг ортиши натижасида Непалнинг йирик шаҳарларида карантин жорий этилди. Май ойининг бошида эса ички ва ташқи авиақатновларни бекор қилди.

Непалда вакцинация даражаси жуда секинлик билан олиб борилмоқда, мамлакатнинг бор-йўғи 7 фоизи вакцинанинг биринчи дозасини олди. Бу асосан қўшни Ҳиндистондаги вазият билан боғлиқ. У ерда касаллик тарқалишининг кескин ортиши натижасида Ҳиндистон ўз вакцинасини Непалга жўнатишни тўхтатиб қўйди. Ҳозир Непал Россиянинг «Спутник V» вакцинасини сотиб олиш бўйича музокаралар ўтказмоқда, шунингдек, Хитой Непалга бир неча юз минг вакцина хайрия қилди.

Аввалроқ Ҳиндистонда 6 май куни бир кеча-кундузда 414 188 кишида коронавирус аниқлангани, бу кунлик касалланиш сонининг ўсиши бўйича янги рекорд экани ҳақида хабар берилди. Хабарга кўра, кун давомида 3 915 киши вафот этган ва ўлимлар сони бўйича ҳам суткалик рекорд янгиланган. Шу билан бирга, 313,5 минг киши касалликдан соғайган.

Эслатиб ўтамиз, Ўзбекистон президенти Шавкат Мирзиёев топшириғига кўра, 1 май куни Деҳли шаҳрига инсонпарварлик кўмаги етказилган эди.