Nepalda koronavirus bilan kasallanish darajasining keskin ortishi natijasida mamlakatdagi shifoxonalarda joy qolmadi, deb yozmoqda Associated Press nashri.
2021-yilning 6-may kuni 30 million aholisi bo‘lgan ushbu mamlakatda rekord darajada 9070 kishida koronavirus qayd etildi. Bu bir oy avvalgiga taqqoslaganda 30 barobar ko‘proq. Shifokorlarning so‘zlariga ko‘ra, bugungi kunda koronavirusga chalingan bemorlar davolanayotgan shifoxonalarda bo‘sh o‘rinlar umuman qolmagan.
“Bo‘sh o‘rinlar bo‘lgan taqdirda ham, kislorod tanqisligi muammosi bor. Biz esa hali bu inqirozning cho‘qqisiga yetmadik”, — dedi Katmandu shahri shifoxonalarining bosh shifokorlaridan biri.
Aprel oyidan boshlab koronavirus bilan kasallanish darajasining ortishi natijasida Nepalning yirik shaharlarida karantin joriy etildi. May oyining boshida esa ichki va tashqi aviaqatnovlarni bekor qildi.
Nepalda vaksinatsiya darajasi juda sekinlik bilan olib borilmoqda, mamlakatning bor-yo‘g‘i 7 foizi vaksinaning birinchi dozasini oldi. Bu asosan qo‘shni Hindistondagi vaziyat bilan bog‘liq. U yerda kasallik tarqalishining keskin ortishi natijasida Hindiston o‘z vaksinasini Nepalga jo‘natishni to‘xtatib qo‘ydi. Hozir Nepal Rossiyaning “Sputnik V” vaksinasini sotib olish bo‘yicha muzokaralar o‘tkazmoqda, shuningdek, Xitoy Nepalga bir necha yuz ming vaksina xayriya qildi.
Avvalroq Hindistonda 6-may kuni bir kecha-kunduzda 414 188 kishida koronavirus aniqlangani, bu kunlik kasallanish sonining o‘sishi bo‘yicha yangi rekord ekani haqida xabar berildi. Xabarga ko‘ra, kun davomida 3 915 kishi vafot etgan va o‘limlar soni bo‘yicha ham sutkalik rekord yangilangan. Shu bilan birga, 313,5 ming kishi kasallikdan sog‘aygan.
Eslatib o‘tamiz, O‘zbekiston prezidenti Shavkat Mirziyoyev topshirig‘iga ko‘ra, 1-may kuni Dehli shahriga insonparvarlik ko‘magi yetkazilgan edi.
Izoh (0)