Qozog‘iston prezidenti Qosim-Jo‘mart To‘qayev 19—20-may kunlari rasmiy tashrif bilan Tojikistonga keladi hamda mazkur mamlakat rahbari Emomali Rahmon bilan muzokaralar olib boradi. Bu haqda Qozog‘iston prezidentining matbuot kotibi Berik Uali ma’lum qildi, deb yozadi “TASS”.
Foto: Avesta.news.kz
“Joriy yilning 19—20-may kunlari prezident Qosim-Jo‘mart To‘qayev Tojikiston prezidenti Emomali Rahmonning taklifiga binoan rasmiy tashrif bilan Tojikiston Respublikasida bo‘ladi. Tashrif davomida ikki davlat rahbarlari tor va kengaytirilgan formatda uchrashuvlar o‘tkazishi rejalashtirilgan”, — deb yozdi Uali o‘zining Facebook sahifasida.
Uning ta’kidlashicha, muzokaralar kun tartibidan siyosiy muloqotni yanada mustahkamlash, savdo-iqtisodiy, sarmoyaviy va madaniy-gumanitar aloqalarni rivojlantirishga e’tibor qaratgan holda Qozog‘iston—Tojikiston strategik sherikligini rivojlantirish masalalari o‘rin olgan. “Mintaqaviy hamkorlikni faollashtirish, Markaziy Osiyoda barqarorlik va xavfsizlikni ta’minlashga alohida e’tibor qaratiladi”, — dedi matbuot kotibi.
2019-yil iyun oyida To‘qayev Tojikistonda Osiyoda o‘zaro hamkorlik va ishonch choralari bo‘yicha konferensiyaning beshinchi sammitda bo‘lib, o‘shanda Rahmon bilan ham uchrashuv o‘tkazgan edi. O‘z navbatida, Tojikiston rahbari 2018-yil mart oyida Qozog‘istonda Nursulton Nazarboyev prezidentligi davrida respublikaga tashrif buyurgan.
Eslatib o‘tamiz, Shavkat Mirziyoyev Tojikiston prezidenti Emomali Rahmonning taklifiga binoan 10−12-iyun kunlari rasmiy tashrif bilan Dushanbeda bo‘ladi.
