Amazon асосчиси Жефф Безосга тегишли Blue Origin компанияси 20 июнда New Shepard кемасида космик сайёҳлар учун биринчи суборбитал кузатув парвозини амалга оширишни режалаштирмоқда.
Кемадаги олти ўриндан бири уч босқичдан иборат беш ҳафталик онлайн аукционга қўйилади. 5 майдан 19 майгача ўтказиладиган биринчи турда компаниянинг сайтида исталган миқдор учун талабнома қолдириш мумкин ва у бошқа иштирокчиларга ошкор этилмайди.
19 майда бошланадиган иккинчи босқичда кимошди савдоси иштирокчилари таклиф этилган барча маблағлар билан танишиб чиқиши мумкин бўлади ва ўз иштирокини давом эттириш учун таклиф миқдорини ошириб боришига тўғри келади. 12 июнь куни бўлиб ўтадиган учинчи босқичда савдолар онлайн аукцион шаклида якунланади.
Парвоз вақтида аукцион ғолиби ва бошқа космик сайёҳлар New Shepard кемасида Ердан 100 километр баландликка кўтарилади. Reuters’нинг ёзишича, парвоз иштирокчилари бир неча дақиқа давомида вазнсизлик ҳолатини ҳис қилади ва сайёрамизнинг эгрилигини томоша қилади.
Reuters’нинг қайд этишича, 2018 йилда Blue Origin космик сайёҳлардан парвоз учун энг камида 200 минг доллар олишни режалаштирган.
Сайёҳлик парвозларини энг эртаси билан 2022 йилда бошлашни режалаштираётган Virgin Galactic компанияси космик парвоз учун чипталарни 200—250 минг долларга сотмоқда. Ушбу парвозлар компания асосчиси, миллиардер Ричард Брэнсоннинг 2021 йил охирига режалаштирилган парвозидан сўнг бошланади.
Аввалроқ Жефф Безос ўзининг Blue Origin аэрокосмик компанияси томонидан ишлаб чиқилган New Shepard космик кемаси учун чипталар сотуви бошланганини эълон қилган эди. Компаниянинг маълумот беришича, ҳаммада ушбу капсулада космосга чиқиш имконияти бўлади.
Мавзуга доир:
Изоҳ (0)