Jeff Bezosning kosmik kompaniyasi koinotga bitta chiptani onlayn auksion orqali sotadi

Amazon asoschisi Jeff Bezosga tegishli Blue Origin kompaniyasi 20-iyunda New Shepard kemasida kosmik sayyohlar uchun birinchi suborbital kuzatuv parvozini amalga oshirishni rejalashtirmoqda.

Kemadagi olti o‘rindan biri uch bosqichdan iborat besh haftalik onlayn auksionga qo‘yiladi. 5-maydan 19-maygacha o‘tkaziladigan birinchi turda kompaniyaning saytida istalgan miqdor uchun talabnoma qoldirish mumkin va u boshqa ishtirokchilarga oshkor etilmaydi.

19-mayda boshlanadigan ikkinchi bosqichda kimoshdi savdosi ishtirokchilari taklif etilgan barcha mablag‘lar bilan tanishib chiqishi mumkin bo‘ladi va o‘z ishtirokini davom ettirish uchun taklif miqdorini oshirib borishiga to‘g‘ri keladi. 12-iyun kuni bo‘lib o‘tadigan uchinchi bosqichda savdolar onlayn auksion shaklida yakunlanadi.

Parvoz vaqtida auksion g‘olibi va boshqa kosmik sayyohlar New Shepard kemasida Yerdan 100 kilometr balandlikka ko‘tariladi. Reuters’ning yozishicha, parvoz ishtirokchilari bir necha daqiqa davomida vaznsizlik holatini his qiladi va sayyoramizning egriligini tomosha qiladi.

Reuters’ning qayd etishicha, 2018-yilda Blue Origin kosmik sayyohlardan parvoz uchun eng kamida 200 ming dollar olishni rejalashtirgan.

Sayyohlik parvozlarini eng ertasi bilan 2022-yilda boshlashni rejalashtirayotgan Virgin Galactic kompaniyasi kosmik parvoz uchun chiptalarni 200—250 ming dollarga sotmoqda. Ushbu parvozlar kompaniya asoschisi, milliarder Richard Brensonning 2021-yil oxiriga rejalashtirilgan parvozidan so‘ng boshlanadi.

Avvalroq Jeff Bezos o‘zining Blue Origin aerokosmik kompaniyasi tomonidan ishlab chiqilgan New Shepard kosmik kemasi uchun chiptalar sotuvi boshlanganini e’lon qilgan edi. Kompaniyaning ma’lumot berishicha, hammada ushbu kapsulada kosmosga chiqish imkoniyati bo‘ladi.