Иккинчи жаҳон уруши даврида Ленинград қамалидан сўнг бедарак йўқолган аскар — Бобораҳим Абдуллаевнинг хоки Ўзбекистонга олиб келинди, дея хабар бермоқда Мудофаа вазирлиги матбуот хизмати.
Маълумот учун, 1922 йил Самарқанд вилояти Каттақўрғон туманида туғилган Бобораҳим Абдуллаев 1941 йил Иккинчи жаҳон урушига кетган.
Уруш тугагач, унинг бедарак йўқолганлиги тасдиқланган. Бироқ 2020 йил октябрь ойида Санкт-Петербургнинг «Линия фронта» қидирув отряди томонидан Ленинград вилояти Кировск тумани Молодцово қишлоғи яқинида Иккинчи жаҳон урушида вафот этган аскарларни қидирув ишлари олиб борилиши натижасида бир аскарнинг жасади қолдиқлари ёнидан топилган ҳужжати ва медальонига кўра Бобораҳим Абдуллаев эканлиги тасдиқланди.
Санкт-Петербург шаҳар ташқи алоқалар қўмитаси бошқармаси бошлиғи Е.Кассюранинг таъкидлашича, Ленинград қамали пайтида урушдан, совуқдан ва очликдан 420 минг нафар аҳоли вафот этган, шулардан 7 минг нафари ўзбекистонлик аскарлар бўлган ва улар хотирасига Санкт-Петербург шаҳридаги Пскаревский қабристонида ёдгорлик ўрнатилган.
Ўз навбатида Ўзбекистон ҳукумати ва дипломатик ваколатхона номидан ўзбек қаҳрамонини топишда ва уни ватанига қайтаришда зарур ишлар олиб борганлари учун уларга миннатдорчилик билдирилди.
Ватанига келтирилган ўзбек аскарининг хоки Марказий ҳарбий округ қўмондонлиги бошчилигида ва Каттақўрғон туман ҳокимлиги, фахрийлар, ёшлар ва марҳумнинг яқинлари иштирокида ўзи туғилиб ўсган Энам яхши қишлоғининг халқ қабристонига мусулмонлар удумига кўра қайта дафн этилди.
Маросимда марҳум ҳақига Қуръон тиловат қилиниб, яқинларига ҳамдардлик билдирилди.
«Эндигина эсимни таниганимда, отам билан энам, икки болам урушдан қайтмади-я, дея хўрсиниб йиғлаганлари ҳамон ёдимда. Акам энди йўқолган аскарлар қаторида эмас, балки ўзининг қаҳрамон сафдошлари билан ўзбек заминида абадий тинчлик топган аскар бўлди. Бунинг учун барча-барчага ўз минатдорчилигимни билдираман», — дейди Бобораҳим Абдуллаевнинг синглиси Ойсаҳат Исломова.
Марҳумнинг хоки билан биргаликда келтирилган буюмлари эндиликда, яқинларининг розилигига кўра, давлат раҳбарининг ташаббуси билан Тошкент шаҳрида бунёд этилган «Шон-шараф» музейида сақланадиган бўлди.
Бундан аввал Россияда Иккинчи жаҳон уруши фахрийларига бериладиган мукофот пули Ўзбекистон ва Қозоғистондагига нисбатан бир неча баравар кам бўлиб чиққани, Ўзбекистонда Иккинчи жаҳон уруши қатнашчилари ва ногиронларига 12 миллион сўм миқдорида бир марталик пул мукофоти берилиши ҳамда Шавкат Мирзиёев 9 май — Хотира ва қадрлаш кунига тайёргарлик кўриш бўйича қарорни имзолагани ҳақида хабар берилганди.
Изоҳ (0)