Qirg‘iziston Ichki ishlar vazirligi Tojikiston bilan chegaradagi vaziyatni nazorat qilmoqda, sulh buzilishi holatlari qayd etilmadi. Bu haqda 3-may, dushanba kuni muassasa matbuot xizmati ma’lum qildi, deb yozadi “Interfaks”.
“Botken viloyatining barcha tumanlari va qishloqlarida vaziyat barqaror, tungi vaqtda mojarolar kuzatilmadi”, — deyiladi xabarda.
Huquq-tartibot organlari ma’lumotlariga ko‘ra, ichki ishlar organlari blokpostlarda va chegara yaqinidagi tumanlarda xavfsizlikni kuchaytirmoqda, mahalliy aholi bilan tushuntirish ishlari olib borilmoqda.
So‘nggi ma’lumotlarga ko‘ra, to‘rt kunlik nizo mobaynida Qirg‘iziston tomonida 34 kishi halok bo‘lgan, 178 kishi jabrlangan. Qirg‘iziston IIV ma’lumotlariga ko‘ra, nizoda halok bo‘lganlarning barchasi o‘qotar qurol orqali o‘ldirilgan.
FVV ma’lum qilishicha, harbiy nizo oqibatida 78 ta uy, ikkita maktab va bitta bolalar bog‘chasi, shuningdek, uchta chegara posti, o‘nta yoqilg‘i quyish shoxobchasi, sakkizta do‘kon, bitta feldsher-akusherlik punkti va militsiya binosi jiddiy zarar ko‘rgan.
Botken viloyati aholisining zarar ko‘rgan uylari davlat hisobidan to‘liq tiklab beriladi. Viloyat ma’muriyati ma’lumotlariga qaraganda, 60 mingdan ortiq aholi nizo hududini tark etgan.
Qirg‘iziston chegara bo‘linmalari va huquq-tartibot organlari kuchaytirilgan rejimda xizmat o‘tashda davom etmoqda.
Tojikiston hukumati Qirg‘iziston bilan chegaradagi to‘qnashuvlarda halok bo‘lganlar soni haqida rasman e’lon qilganicha yo‘q, ammo mahalliy manbalarga ko‘ra, 2-may kechqurun holatiga taxminan 16 kishi o‘ldirilgan. Yaralanganlar soni 110 kishidan oshadi, ular orasida Isfara shahar meri ham bor.
Tasdiqlanmagan xabarlarga ko‘ra, Tojikiston tomonida halok bo‘lganlar soni 20 nafargacha, yaralanganlar — 160 nafargacha borishi mumkin.
Izoh (0)