Европанинг энг йирик шаҳарларидаги намойишлар полиция билан тўқнашувларга айланиб кетди

Европанинг энг йирик шаҳарларида норозилик намойишлари бўлиб ўтиб, улар полиция билан тўқнашувларга айланиб кетди. Хусусан, гап Берлин, Лондон, Брюссель, Цюрих ва Париж ҳақида бормоқда, деб ёзади «РБК».

Британия пойтахтида ҳукуматдан полиция ваколатларини кенгайтирадиган қонун қабул қилинишини бекор қилишни талаб этиб норозилик акциялари бўлиб ўтди. Берлин, Цюрих ва Парижда биринчи май манифестациялари, Брюсселда эса коронавирус чораларининг кучайтирилишига қарши акциялар ташкил қилинди.

Биринчи май намойишлари бутун Германия бўйлаб ўтказилган, аммо полиция билан тўқнашувлар фақат Берлинда бўлиб ўтган. «Намойишчилар ва полициячилар ўртасида кескин тўқнашувлар бўлиб ўтди», — деб ёзади маҳаллий нашрлардан бири. Унинг маълумотларига кўра, акция иштирокчилари полициячиларга тош ва бутилкалар отган, шунингдек, ахлат қутилари  ва поддонларни ёққан. Бунга жавобан ҳуқуқ-тартибот органлари ходимлари махсус воситаларни қўллаган. Тартибсизликлар оқибатида бир неча киши ҳибсга олинди, уч нафар полиция ходими ва камида икки нафар намойишчи жабрланди.

Reuters маълумотларига кўра, мингдан ортиқ одам полиция ваколатларини кенгайтириш ташаббусини бекор қилиш талаби билан Лондон маркази бўйлаб юриш қилиб ўтди. Марш Лондон жанубидаги истироҳат боғларидан бирида якунланган, у ерда намойишчилар полициячилар билан «жангга киришган». Полиция хабарига кўра, тўққиз киши ҳибсга олинган.

Брюсселдаги Буа-де-ла-Камбр боғида мингдан ортиқ одам тўпланиб, коронавирус тарқалиши туфайли жорий қилинган чекловларни юмшатишни талаб қилди. Акция иштирокчилари «Озодлик» дея баралла қичқириб, ҳуқуқ-тартибот ходимларига тухумлар улоқтирди. Митинг иштирокчиларини тарқатиш учун полиция сув замбараги, аччиқ қалампирли газ ва дубинкалардан фойдаланди. Оқибатда камида ўн киши жабрланди. Бир киши полиция отидан зарба еб жароҳатланган.

Париждаги биринчи май намойишлари ҳам тартибсизликлар билан тугади. Уларда касаба уюшмалари ва ёшлар ташкилотлари вакиллари, социалистик ва коммунистик партиялар вакиллари, шунингдек, «сариқ нимчалар» ҳаракати тарафдорлари қатнашди. Дастлаб акция тинч ўтаётган эди, аммо кейинроқ намойишчилар полициячиларга пиротехника, тош ва бутилкалар улоқтира бошлади. Бунга жавобан ҳуқуқ-тартибот органлари ходимлари кўзни ёшлантирувчи газ ва сув замбарагидан фойдаланди. Франция ички ишлар вазири Жералд Дерманин маълум қилишича, Париждаги намойишлар чоғида 34 киши қўлга олинган. Умумий меҳнат конфедерацияси маълумотларига кўра, бутун Франция бўйлаб намойишларда 150 минг киши, Парижда эса 25 минг киши қатнашган. Le Parisien ёзишича, Франция пойтахтидаги тартибсизликларда 21 киши жабрланган, шуларнинг тўрт нафари жиддий жароҳат олган.

Цюрихда Меҳнат байрами муносабати билан бир йўла бир нечта намойишлар ўтказилди. Шаҳар полицияси маълумотлари бўйича намойишчилар ҳуқуқ-тартибот ходимларига пиротехника буюмлари ва бутилкалар улоқтирган. Бунга жавобан полициячилар рухсат этилмаган акцияларни тарқатишда резина ўқларни қўллади. Полиция аниқлик киритишича, уч киши қўлга олинган. Жабрланганлар ҳақида маълумот берилмади.