Колумбия президенти Иван Дуке солиқ ислоҳотига қарши норозилик намойишлари бўлиб ўтаётган шаҳарларга ёрдам учун армия юборишини эълон қилди, деб ёзади «Коммерсантъ». Давлат раҳбари таъкидлашича, ҳарбийлар фуқаролар хавфсизлигига таҳдид бўлган жойларда иш олиб боради.
«Ҳарбий кўмак фуқаролар хавфсизлигига нисбатан таҳдид юқори бўлган шаҳарларда ва аҳолининг давлат томонидан ҳимоя қилинишига зарурат бўлган жойларда амал қилади, бу конституция ва қонунчиликда белгилаб қўйилган ва кучда қолади», — дейилади президент баёнотида.
Солиқ ислоҳоти лойиҳаси бюджетни қўшимча 6,8 миллиард долларга (тахминан ялпи ички маҳсулотнинг 2 фоизи) тўлдиришни кўзда тутади. ҚҚС (қўшилган қиймат солиғи) қўллашни кенгайтириш, қўшимча йиғимларни жорий қилиш, аҳолининг 2,4 миллион песо (660 доллар)дан юқори бўлган барча даромадларини солиққа тортиш таклиф қилинмоқда. Бу оммавий норозилик намойишларига олиб келди. Икки ҳафта ичида 200 дан ортиқ полиция ходимлари жабрланди, 200 га яқин одам қўлга олинди. ОАВлар полиция ва намойишчилар томонидан ҳам қурбонлар ва жабрланганлар ҳақида хабар бермоқда. Аввалроқ Дуке ислоҳот лойиҳасини ўзгартиришни буюрган эди.
Изоҳ (0)