Санкт-Петербургда 22 йил давомида гаражда сақланган мутлақо янги «ВАЗ-2104» топилди. Мазкур универсал 1999 йилда автосалондан харид қилинган, бироқ қандайдир сабабларга кўра, ундан фойдаланилмаган, деб хабар беради Motor.

Фото: Instagram / Андрей Осипов

1999 йилдан 2021 йилга қадар «ВАЗ-2104» қуруқ гаражда сақлангани сабаб худди заводдан чиққан ҳолатдагидек сақланган. Машина кузови, салони ва ҳаракатга келтирувчи қисмлари — янги автомобилникидек.

«ВАЗ-2104»нинг ягона камчилиги — чап томонидаги бироз эгилган жойи. Капотни бўямасдан туриб тўғрилаш мумкин, қанотни таъмирлаш эса бироз мураккаб, чунки зарба теккан жойида занглаш аломатлари мавжуд.

Фото: Instagram / Андрей Осипов

Фото: Instagram / Андрей Осипов

22 йил давомида «ВАЗ-2104» 282 километргина йўл босган, шу сабабли машинада 1990 йилларнинг охирига тегишли артефактларни учратиш мумкин. Оригинал захира ғилдираги ва «аптечка», орқа ўриндиқларнинг пакетлари, ойналардаги штампниклар сақланиб қолган. Ўлчами 175/70/ Р13 бўлган «БЛ-85» шиналари ҳам заводдан чиққан ҳолидек турибди.

Фото: Instagram / Андрей Осипов

Фото: Instagram / Андрей Осипов

Гап «яхшиланган» «ВАЗ-21043» ҳақида кетаётган экан, машина капоти остидан 71 от кучи ва 104 Нм айланувчи моментни тақдим этишга қодир 1,5 литрли карбюратор мотор ўрин олган. Агрегат 5 поғонали механик узатмалар қутиси ёрдамида бошқарилади.

Фото: Instagram / Андрей Осипов

Фото: Instagram / Андрей Осипов

Ушбу «ВАЗ-2104»нинг қийматини баҳолаш бироз мураккаб, чунки бу каби универсаллар катта тиражларда чиққан. Аммо сўнгги вақтларда топилган минимал даража йўл босган «Жигули»лар янги Lada Vesta нархида сотилмоқда.

Аввалроқ Россияда завод пломбалари олинмаган 26 йиллик «Жигули» янги BMW Х3 нархида сотувга қўйилгани тўғрисида хабар берилганди.