Тошкентда Captiva Nexia ва «Москвич»га бориб урилиши оқибатида бир киши ҳалок бўлди, яна тўрт нафари жароҳатланди

Тошкентнинг Мирзо Улуғбек туманидаги Темур Малик ва Мирзо

Улуғбек кўчалари кесишмасида 2 май куни соат 00:23 да ЙТҲ содир бўлди, деб хабар бермоқда пойтахт ИИББ матбуот хизмати.

Маълум қилинишича, 21 ёшли йигит Ш.У. ўзига тегишли бўлмаган (ҳайдовчилик гувоҳномаси ва бошқа ҳужжатлар ёнида топилмаган) Captiva’да маст ҳолда тезликни сезиларли даражада ошириб ҳаракатланиб, 29 ёшли аёл О.З. бошқарувидаги Nexia билан тўқнашган. Сўнг жамоат транспорти тўхташ жойдаги 59 ёшли эркак Ш.М.га тегишли «Москвич»га бориб урилган.

ЙТҲ оқибатида Nexia ҳайдовчиси, Captiva ҳайдовчиси ҳамда унинг йўловчилари 21 ёшли А.У. (транспорт воситаси эгаси) ва 20 ёшли Р.Н. турли даражада тан жароҳатлари олиб, касалхонага ётқизилган. «Москвич» ҳайдовчиси олган тан жароҳатларидан воқеа жойида ҳалок бўлган.

Воқеа содир бўлишининг дастлабки сабаби: Nexia ҳайдовчиси манёвр қилаётганда Captiva ҳайдовчиси ҳаракатининг устуворлигини эътиборга олмаган. Тўқнашув оқибатида Captiva ҳайдовчиси бошқарувни йўқотиб, тўхтаб турган «Москвич»га бориб урилган.

Ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши қўзғатилган. Ҳозирда тергов ҳаракатлари олиб борилмоқда.

Бундан аввал Тошкентнинг Яшнобод туманида тўртта автомобиль иштирокида ЙТҲ юз бергани, Чилонзорда Cobalt ва Matiz тўқнашиб, ағдарилиб кетгани, Юнусобод туманида дарахтга урилган Lacetti’нинг 25 ёшли ҳайдовчиси вафот этгани ҳақида хабар берилган эди.