Фарғона нефтни қайта ишлаш заводи яна сотувга қўйилади

Фарғона нефтни қайта ишлаш заводининг 100 фоиз улуши сотувга қўйилди. Бу ҳақда UzAssets инвестиция компаниясига таяниб, Spot хабар берди.

Мамлакатдаги энг йирик корхоналардан бири

Фарғона НҚИЗ — Ўзбекистонда нефтни қайта ишлаш ҳажми бўйича етакчи заводлар орасида иккинчи ўринда туради. Ҳозирда ишлаб чиқариш қуввати — йилига 2 миллион тонна, 2020 йилда утилизация коэффициенти 50 фоизга ортган.

Бу ерда нефть маҳсулотлари ва ёқилғи-мойлаш материалларининг 60 тури, жумладан, «Евро-4» ва «Евро-5» стандартларига жавоб берадиган дизель ёқилғиси ишлаб чиқарилади.

Ишлаб чиқарилган маҳсулотнинг 94 фоизи маҳаллий бозорда сотилади, қолгани экспорт қилинади. Заводда 6,5 мингга яқин ишчи меҳнат қилади.

Ариза бериш жараёни барча учун очиқ ҳисобланади. Қизиқиш билдирган шахслар инглиз, рус ёки ўзбек тилида 28 майга қадар хат шаклида ариза бериши мумкин. Битимга оид ва боғланиш бўйича батафсил маълумотлар билан қуйидаги ҳавола орқали танишиш мумкин.

Бу биринчи уриниш эмас

Ўзбекистон Президентининг 2019 йил 10 апрелдаги қарорига кўра (ҳозирда амалда), Индонезиянинг RT Trans Asia Resources компанияси «Ўзнефтмаҳсулот»нинг Фарғона нефтни қайта ишлаш заводида 100 фоиз давлат улушини 16 миллион доллар миқдорида бошланғич тўловини амалга ошириши орқали олиши керак эди. Вазирлар Маҳкамасининг 25 апрелдаги қарори билан (у ҳам ҳамон кучда) давлат улушини амалга ошириш шартлари эълон қилинган, жумладан, Фарғона нефтни қайта ишлаш заводи айланма маблағлари учун камида 120 миллион доллар жалб этиш белгиланган. Бундан ташқари, ўзбекистонлик Аъзам ва Омон Аслановлар заводни модернизацияси ва келажакда ривожлантиришга оид режалари билан бўлишганди.

Бироқ Давлат активларини бошқариш агентлиги маълумотларига кўра, Фарғона нефтни қайта ишлаш заводини Jizzakh Petroleum ҚК МЧЖ ишончли бошқарувига бериш бўйича қарор қабул қилинган. Jizzakh Petroleum қўшма корхонаси «Ўзбекнефтгаз» ва Gaz Project Development Central Asia томонидан 2017 йил июнда яратилган. Лойиҳа кўра, устав капиталидаги иштирокчилар улушини «Ўзбекнефтгаз» улушининг 60 фоиздан 30 фоизгача пасайиши ва хорижий муассислар улушини 40 фоиздан 70 фоизгача ўсиши билан қайта тақсимланди.

Июнь ойида муассислар таркиби қуйидагича: Кипрдан Belvor Holding Limited (68 фоиз), «Ўзбекнефтгаз» (30 фоиз) ва Gas Project Development Central Asia (2 фоиз), ҳозирда «Ўзбекнефтгаз» ва Belvor Holding Limited ўртасидаги улуш 49 фоиз бўлиб тақсимланган.