Жонс Ҳопкинс университети маълумотларига кўра, дунё бўйича коронавирусни юқтириб олганлар сони 152 887 695 кишига етди. Ушбу кўрсаткич бўйича АҚШ (32,4 миллион), Ҳиндистон (19,9 миллион), Бразилия (14,7 миллион), Франция (5,7 миллион) ва Туркия (4,8 миллион) етакчилик қилмоқда. Шунингдек, COVID-19 оқибатидаги ўлимлар сони 3 203 199 кишини ташкил қилмоқда.
Исроилда вояга етган аҳолининг 75 фоизи тўлиқ эмланди
Исроилнинг вояга етган аҳолисининг тўртдан уч қисми коронавирусга қарши тўлиқ эмланди, натижада мамлакат вакцинация бўйича дунёда етакчига айланди.Исроил Соғлиқни сақлаш вазирлигига кўра, 5 405 523 киши вакцинанинг биринчи, 5 094 785 киши эса иккинчи дозасини олган.
Таъкидланишича, мамлакат аҳолисининг 55 фоизи ва вояга етган аҳолининг (16 ёшдан ошган) қарийб 75 фоизи тўлиқ вакцина олган. Биринчи дозани олганлар аҳолининг 58 фоизини, вояга етган аҳолининг эса 79 фоизини ташкил қилади.
1 мартдан ССВ 16 ёшдан ошган ва соғайганига уч ойдан ортиқ вақт ўтган бўлса, коронавирус билан касалланиб ўтганлар ҳам эмланиши мумкин, деб эълон қилди. Улар касалланмаганлардан фарқли равишда, вакцинанинг фақат битта дозасини олади.
Айни вақтда вояга етмаган аҳолини эмлаш масаласи муҳокама қилинмоқда. Тадқиқотлар ўтказилмоқда. 31 март куни Pfizer компанияси коронавирусга қарши вакцина 12 ёшдан ошган ўсмирлар учун 100 фоиз самарали, деб эълон қилган эди.
Грузияда коронавирус туфайли жамоат транспорти тўхтатилди
Грузияда коронавирус тарқалиши билан боғлиқ вазият туфайли 3 майдан 12 майгача жамоат транспорти ишламайди. Тақиқ такси, шунингдек, шаҳарлараро ташувларга тааллуқли бўлмайди. Шаҳарлараро қатнов аввалги қоидалар бўйича амалга ошади.Бундан ташқари, ҳукумат қарори бўйича, 4—11 май кунлари дам олиш деб эълон қилинди. Хусусий ва давлат муассасалари ходимларига масофавий режимда ишлаш тавсия этилди.
Апрелда ССВнинг Касалликлар ва жамият саломатлиги устидан назорат миллий маркази бош директори Амиран Гамкрелидзе мамлакатда коронавируснинг учинчи тўлқини бошланганини маълум қилган эди.
Республикада асосан «британча» штамм айланиб юрибди. Грузияда коронавирусга чалиниш бўйича илк ҳолат 2020 йил 26 февралда қайд этилган. Ўшандан буён 312 445 киши касалланиб, шуларнинг 4151 нафари вафот этган.
Республикада 15 мартдан аҳолини AstraZeneca ва Pfizer вакцинаси билан эмлаш бошланди, ҳозиргача 45 мингдан ортиқ одам эмланган.
Грецияда ресторан ва кафелар фаолияти тикланади
Грецияда 3 май, душанба кунидан ресторан, кафе, бар ва бошқа умумий овқатланиш муассасалари очилади. Ҳозирча улар фақат очиқ айвонларда хўрандаларни қабул қилиши мумкин.Шу пайтгача муассасалар егуликларни фақат уйга олиб кетиш учун сотарди ёки етказиб берарди. Айвонлар 22:45 гача ишлаши мумкин. Шу билан бирга, кафе ва ресторанлар ходимлари тест топшириши, столлар орасида муайян масофа бўлиши, санитария қоидалари ва гигиена чораларига риоя қилиниши шарт.
Бундан ташқари, комендантлик соати энди бир соатга кечроқ (аввалги 22:00 ўрнига, энди 23:00 да) бошланиб, 5:00 гача давом этади. Қоидабузарлар учун 300 евро миқдорида жарима кўзда тутилган.
Грецияда одатий ҳаётга қайтиш бўйича кейинги босқич 10 майда бошланади, шунда бошланғич ва ўрта мактабларни очиш режалаштирилмоқда.
Изоҳ (0)