Ҳиндистонда охирги бир сутка ичида коронавирусга чалиниш бўйича 401 993 та ҳолат қайд этилди, бу пандемия бошланганидан буён бутун дунёда ҳали ҳеч бир мамлакатда қайд этилмаган антирекорд, деб ёзмоқда Reuters.
Ҳиндистонда пандемия бошланганидан бери касалликка чалинганларнинг умумий сони 19 миллиондан ошиб кетган. Март ойи охиридан буён мамлакатда ҳар икки ҳафтада коронавирус билан касалланганлар сони икки бараварга кўпайиб бормоқда; охирги 10 кун ичида COVID-19 юқтириб олганлар сони 300 минг нафардан ошган. Шу ҳафтада бутун дунёда коронавирус билан касалланган одамларнинг 43 фоиз улуши Ҳиндистонга тўғри келган.
Пандемия бошланган вақтдан бери Ҳиндистонда COVID-19 оқибатида вафот этганлар сони 211 мингдан ошган, бугунги кунга келиб Ҳиндистонда кунига 3,5 минг нафар одам коронавирус асоратлари оқибатида қурбон бўлмоқда.
Reuters агентлигининг қайд этишича, охирги ҳафталарда касалланганлар сонининг кескин кўпайишига ҳукуматнинг маҳаллий сайловлар олдидан оммавий тадбирлар, диний маросимларни тақиқламагани сабаб бўлган. Март ойи бошида ҳиндистонлик олимлар ҳукуматни мамлакатда коронавируснинг янги зарарли штамми B.1.617 тарқалаётгани ҳақида огоҳлантирган эди, бироқ давлат оммавий тадбирларга чекловлар қўймади, аксинча тестлар сонини оширишга қарор қилди.
Ҳиндистонда 1 майдан аҳолини коронавирусга қарши оммавий эмлаш (бунгача мамлакатда ёшдан ошган одамлар вакцинация қилинган) бошланиши лозим эди, аммо штатлардаги ҳукуматлар вакциналар эмланишни истаётган аҳолининг ҳаммасига етмаслигини билдирган. Ҳиндистон Соғлиқни сақлаш вазирлигининг ахбороти бўйича 30 апрель ҳолатига кўра мамлакатда аҳолининг 9,1 фоизи коронавирусга қарши вакцинанинг дастлабки дозасини қабул қилиб олган, тўлиқ эмланганлар эса аҳолининг 1,9 фоиз қисмини ташкил этади.
Ҳиндистонда асосан AstraZeneca вакцинаси, шунингдек, Бҳарат фирмасининг Covaxin препаратидан аҳолини вакцинация қилишда фойдаланилган. 1 майдан мамлакатга Россиянинг «Спутник V» вакцинасининг биринчи партияси етказиб берилган, ой охирига қадар Россия тўғридан-тўғри инвестициялар фонди Ҳиндистонга яна 3 миллион доза вакцина етказиб бериши кўзда тутилган. Ҳиндистонда июндан бошлаб маҳаллий ишлаб чиқариш маҳсулоти бўлган препаратнинг ойига 50 миллион дозасини тайёрлаш режалаштирилган.
Ҳиндистонда касалланиш ҳолатлари кескин кўпайгани ва янги штамм тарқала бошлагани туфайли кўплаб давлатлар, жумладан, Буюк Британия мамлакат билан алоқаларни чеклаган. АҚШ давлат департаменти 4 майдан бошлаб Ҳиндистонга чиқиш қоидалари қатъийлаштирилишини маълум қилган. Австралия ҳукумати 3 майдан Ҳиндистонда охирги 14 кун ичида бўлиб қайтган мамлакатдаги барча одамлар (хусусан Австралия фуқароларига) жиноий жавобгарликкача бўлган жазо чоралари қўлланилишини билдирган.
Аввал Ҳиндистондаги COVID-касалхонада ёнғин чиқиши оқибатида 18 киши ҳалок бўлгани, ЖССТ Ҳиндистондаги коронавирус билан боғлиқ оғир вазият исталган давлатда юз бериши мумкинлигидан огоҳлантиргани, АҚШнинг коронавирусга қарши курашда Ҳиндистонга 100 млн долларлик ёрдам юбориши ҳақида хабарлар берилганди.
Изоҳ (0)