Ҳиндистон АҚШ ва Европа иттифоқи босими остида Россия нефть импортини тўхтатадиган бўлса, мамлакат йилига 9–11 миллиард доллар атрофида иқтисодий зарар кўриши мумкин. Бу ҳақда Kpler таҳлил маркази ҳисоботига таяниб, Тhе Economic Times хабар берди.
Ҳисоботда айтилишича, Ҳиндистон ҳозирда кунига ўртача 1,8 миллион баррел Россия нефтини импорт қилиб, ҳар баррел учун ўртача 5 долларлик чегирма олмоқда. Агар бу савдо тугатилса, мамлакатнинг умумий импорт харажатлари йиллик ҳисобда миллиардлаб долларга ошиши мумкин. Бундан ташқари, глобал бозорда Россия ёнилғисининг камайиши фонида нархлар кўтарилиши эҳтимоли ҳам юқори. Бу эса харажатларни янада оширади.
Бугунги кунда Ҳиндистон истеъмол қилаётган нефтнинг 32–40 фоизи Россияга тўғри келади. Бу мамлакатга энергия импорти харажатларини камайтириш ва ички ёнилғи нархларини назоратда ушлаб туришга ёрдам бермоқда. Бироқ эндиликда Деҳли АҚШ ва ЕИ талаблари билан Россия билан ҳамкорлик борасида кучли босимга дуч келган.
Kpler марказининг катта таҳлилчиси Сумит Ритолиа бу босимни “икки томонлама ҳужум” деб атаган. Унга кўра, бу чоралар Ҳиндистоннинг нефть харидидаги имкониятларини кескин чеклаб, харажатларда катта ноаниқлик туғдиради. Россия нефтини тўлиқ бошқа манбалар билан алмаштириш логистика нуқтайи назаридан мураккаб ва иқтисодий жиҳатдан ҳам фойдасиз.
“Қоғозда бу мумкиндек, аммо амалда бу жуда мураккаб”, дея таъкидлаган Ритолиа.
Айни пайтда, АҚШ президенти Дональд Трамп 1 августдан бошлаб Ҳиндистондан келтириладиган маҳсулотларга 25 фоизли бож жорий қилишини эълон қилган. У бунга Ҳиндистон томонидан юқори тарифлар, савдо тўсиқлари ва Россия билан энергетика ва мудофаа соҳасидаги ҳамкорликни сабаб қилиб кўрсатган.
Bloomberg манбаларига кўра, Ҳиндистон ҳукумати давлатга қарашли нефть компанияларига Россиядан нефть харид қилишни тўхтатиш бўйича расмий кўрсатма бермаган. Хусусан, давлат ва хусусий нефтни қайта ишлаш заводлари ҳали ҳам мустақил равишда, тижорат асосида харид қилиш ҳуқуқига эга. Шунга қарамай, улар Россиядан ташқари манбалар орқали нефть харид қилиш бўйича режаларни ишлаб чиқишга топшириқ олган.
Россиянинг Ҳиндистондаги элчиси Денис Алиповнинг айтишича, Деҳли Москванинг нефтидан манфаатдор.
“Россия нефть ва гази санкциялар нишонида бўлмаса-да, уларни етказиб бериш ва тўлов қилишда сунъий тўсиқлар яратилмоқда. Шунга қарамай, етказиш ва ҳисоб-китоб бўйича альтернатив йўллар изланади”, деган Алипов.
Россия томонининг фикрича, Ғарб мамлакатлари Россия энергия ресурсларидан воз кечиб катта хатога йўл қўйган. Улар барибир нефть ва газни воситачилар орқали, лекин қимматроқ нархда сотиб олишга мажбур бўлмоқда.
Изоҳ (0)