АҚШнинг иккита атом сувости кемаси “Россия яқинига” етиб келди

АҚШ президенти Дональд Трамп иккита атом сувости кемаси “Россия яқинидаги керакли ҳудудга” етиб келганини айтди. Бу ҳақда Deutsche Welle хабар берди.

Мен аллақачон бу бўйича баёнот берганман ва жавоб шундай: улар ҳозирда мавжуд бўлиши керак бўлган жойда, деган Трамп.

У шу тариқа журналистнинг сувости кемалари етиб келган-келмагани ҳақидаги саволига жавоб берди. Сиёсатчи кемалар айнан қаерда эканига аниқлик киритмаган. Бироқ улар “Россияга яқин” ҳудудда жойлаштирилгани маълум.

1 август куни АҚШ президенти Россия Хавфсизлик кенгаши раис ўринбосари Дмитрий Медведевнинг баёнотларидан сўнг иккита атом сувости кемасини “тегишли ҳудудларга” юбориш тўғрисида буйруқ берди. 

Медведевнинг таҳдиди

Дмитрий Медведев ўз баёнотлари билан Ғарбга бир неча бор таҳдид солган. У қуролли тўқнашув кучайиши, ҳатто ядро қуролидан фойдаланиш эҳтимоли ҳақида очиқ гапирган. Шунингдек, Украинани қўллаб-қувватлаётган мамлакатларга нисбатан ҳам уруш билан қўрқитган.

Сиёсатчи 28 июль куни АҚШ президентининг Россия билан олиб бораётган “ультиматум ўйини” икки давлат ўртасида урушга олиб келиши мумкинлигини айтган. У бу фикрни Трампнинг Россияга Украинадаги урушни 8 августгача тугатиш бўйича муҳлат бергани муносабати билан билдирган.

Трамп эса бу таҳдидни жиддий қабул қилганини таъкидлаган. Шу сабабли иккита атом сувости кемасини Россия яқинига ҳаракатлантиришга буйруқ берган.

Ҳозирда Россиянинг муҳим институтларидан бирини бошқараётган Россия собиқ президенти — Хавфсизлик кенгаши раис ўринбосари — ядро энергетикаси ҳақида жуда хавотирли гапларни айтди. “Ядровий” деган сўз тилга олинганда, мен доим эҳтиёткор бўламан. Шу сабабли мен минтақага иккита атом сувости кемасини юбордим. Мен шунчаки у айтган гаплар баёнот даражасидан нарига ўтмаслигига ишонч ҳосил қилмоқчиман, деган эди Трамп.

АҚШ ва Россиянинг ядровий қудрати қандай?

2025 йилга келиб, АҚШ Ҳарбий-денгиз кучлари таркибида 71 та атом сувости кемаси мавжуд бўлиб, бу уларни дунёдаги энг йирик сувости кучларига айлантиради. Таркиб қуйидагилардан иборат:

• 14 та “Огайо” синфидаги баллистик ракетали сувости кемаси — ядро ҳужуми учун мўлжалланган;
• 4 та “Огайо” синфи асосида қайта қурилган ракетали кемалар — “Tomahawk” қанотли ракеталари билан қуролланган, зарба ёки махсус операциялар учун ишлатилади;
• Тахминан 53 та тез ҳаракатланувчи кўп мақсадли сувости кемалари — разведка, душман сувости кемаларига қарши кураш ва ракета ҳужумларини қўллаб-қувватлаш учун хизмат қилади.

Таққослаш учун, Россия ҳарбий-денгиз флотида 30 тадан кам атом сувости кемаси бор. Шулардан тахминан 10 таси стратегик сувости ракета ташувчилари ҳисобланади. Уларга замонавий “Борей” синфи ва эски моделлар киради. Бу кемалар “Булава” баллистик ракеталари билан қуролланган.

АҚШ ва Россия биргаликда бутун дунё ядровий қуролларининг 87 фоизига эгалик қилади. Улар жаҳон бўйича жанговар ҳолатда бўлган ёки жангга тайёр ядровий каллакларнинг 83 фоизини назорат қилади.